#AA23: ఐకాన్ స్టార్ అల్లు అర్జున్, తమిళ స్టార్ డైరెక్టర్ లోకేష్ కనగరాజ్ క్రేజీ కాంబినేషన్‌లో తెరకెక్కనున్న #AA23 ప్రాజెక్ట్ చుట్టూ ఇప్పుడు సోషల్ మీడియాలో భారీ బిజినెస్ లెక్కలు చక్కర్లు కొడుతున్నాయి. కొంతకాలంగా వాయిదా పడుతూ వస్తున్న ఈ ప్రాజెక్ట్ స్క్రిప్ట్ ఎట్టకేలకు లాక్ అయ్యిందని తెలుస్తోంది. 2027 ఆరంభంలో షూటింగ్ మొదలుపెట్టేందుకు సన్నాహాలు జరుగుతుండగా.. ఈ సినిమా కోసం హీరో, దర్శకుడు, నిర్మాతల మధ్య కుదిరిన భారీ బిజినెస్ డీల్ గురించిన వార్తలు ఇప్పుడు ఇండస్ట్రీ వర్గాల్లో హాట్ టాపిక్‌గా మారాయి.
సోషల్ మీడియాలో జరుగుతున్న ప్రచారం ప్రకారం.. ఈ భారీ బడ్జెట్ చిత్రం కోసం కళ్లు చెదిరే స్థాయిలో పారితోషికం, లాభాల వాటా ఒప్పందం కుదిరినట్లు తెలుస్తోంది. ముఖ్యంగా అల్లు అర్జున్ ఈ సినిమా కోసం ఏకంగా రూ.175 కోట్ల భారీ రెమ్యునరేషన్ అందుకోబోతున్నారట. అంతేకాకుండా, సినిమా విడుదలైన తర్వాత వచ్చే లాభాల్లో బన్నీకి 33 శాతం వాటా దక్కనుందని జోరుగా ప్రచారం జరుగుతోంది. ఇక మిగిలిన లాభాల పంపకం కూడా ఆసక్తికరంగా ఉంది. దర్శకుడు లోకేష్ కనగరాజ్‌కు నికర లాభాల్లో 33 శాతం వాటా, నిర్మాణ సంస్థ మైత్రీ మూవీ మేకర్స్‌కు మిగిలిన 33 శాతం వాటా దక్కేలా ఈ బిజినెస్ డీల్ కుదిరినట్లు వార్తలు వినిపిస్తున్నాయి. పాన్ ఇండియా స్థాయిలో అత్యంత భారీ వ్యయంతో రూపొందనున్న ఈ సినిమాకు సంబంధించిన ఈ లెక్కలు ఇప్పుడు ట్రేడ్ వర్గాలను సైతం ఆశ్చర్యపరుస్తున్నాయి.
లోకేష్ కనగరాజ్ తన మార్క్ యాక్షన్ శైలిలో అల్లు అర్జున్ కోసం ఒక పవర్‌ఫుల్ గ్యాంగ్‌స్టర్ డ్రామా కథను సిద్ధం చేశారని టాక్. తాజాగా ఈ సినిమా స్క్రీన్‌ప్లే పనులు పూర్తి కావడంతో, 2027 ప్రారంభంలో రెగ్యులర్ షూటింగ్ మొదలుపెట్టేందుకు చిత్రబృందం ప్లాన్ చేస్తోంది. ఈ హై-వోల్టేజ్ చిత్రానికి రాక్‌స్టార్ అనిరుధ్ రవిచందర్ సంగీతం అందించనుండటం అంచనాలను మరింత పెంచుతోంది. భారీ బిజినెస్ లెక్కలతో అప్పుడే సెన్సేషన్ క్రియేట్ చేస్తున్న #AA23, వెండితెరపై ఎలాంటి రికార్డులు తిరగరాస్తుందనే దానిపై అందరిలోనూ ఆసక్తి నెలకొంది. మరోవైపు సోషల్ మీడియాలో జరుగుతున్న ఈ ప్రచారంపై మేకర్స్ ఎలా రియాక్ట్ అవుతారో చూడాలి.