పాన్ ఇండియా సినిమాలో మరో మెగా హీరో!

ప్రస్తుతం తెలుగు చిత్రపరిశ్రమలో పాన్ ఇండియా సినిమాల హవా నడుస్తోంది. మంచి కంటెంట్ దొరికితే భారీ బడ్జెట్ పెట్టడానికి కూడా మన నిర్మాతలు వెనకాడటం లేదు. త్వరలోనే మరో మెగా హీరో బిగ్గెస్ట్ పాన్ ఇండియా సినిమాలో నటించే అవకాశం ఉన్నట్లు తెలుస్తోంది. మెగా ప్రిన్స్ వరుణ్ తేజ్ ప్రస్తుతం ‘గని’ సినిమా చేస్తున్న విషయం తెలిసిందే. బాక్సింగ్ నేపథ్యంలో వస్తున్న ఈ సినిమా షూటింగ్ శరవేగంగా జరుగుతోంది. మరోవైపు వెంకటేష్ తో వరుణ్ తేజ్ ‘ఎఫ్ 3’ సినిమాను కూడా పూర్తిచేసుకొని ఉన్నాడు. ఈ సినిమాల తరువాత ప్రవీణ్ సత్తారు దర్శకత్వంలో చేయన్నాడు.

‘గుంటూరు టాకీస్’, ‘పిఎస్‌వి గరుడ వేగ’ వంటి భిన్నమైన సినిమాలు చేసిన ప్రవీణ్ సత్తారు ప్రస్తుతం అక్కినేని నాగార్జునతో ‘ది గోస్ట్’ సినిమా చేస్తున్నాడు. కాజల్ అగర్వాల్ హీరోయిన్ గా నటిస్తోంది. ఈ సినిమా తరువాత ఆయన వరుణ్ తేజ్ తో సినిమా చేయడం దాదాపు ఖరారు అయినట్లు సమాచారం. స్క్రిప్ట్ బాగా ఉండటంతో పాన్ ఇండియాగా ప్లాన్ చేస్తున్నారట. త్వరలోనే ఈ సినిమా సెట్స్‌పైకి వెళ్తున్నట్లు తెలుస్తోంది. ఇప్పటికే రామ్ చరణ్ ‘ఆర్ఆర్ఆర్’ సినిమాతో.. అల్లు అర్జున్ ‘పుష్ప’ సినిమాతో.. పవన్ కళ్యాణ్ ‘హరిహర వీరమల్లు’ సినిమాతో పాన్ ఇండియా చిత్రాలు చేస్తున్న సంగతి తెలిసిందే.