Andrea Jeremiah: కోలీవుడ్లోని మల్టీ టాలెంటెడ్ హీరోయిన్స్లో ఆండ్రియా జెరెమియా ఒకరు. సింగర్ గానే కాకుండా నటిగా కూడా ఆండ్రియా చక్కని గుర్తింపు తెచ్చుకుంది. ఇప్పటి వరకు ఫ్యామిలీ, లవ్, కామెడీ చిత్రాల్లో ఆమె నటించింది. అయితే ఈ సారి ఆండ్రియా యాక్షన్ హీరోయిన్గా కనిపించనుంది. అటవీ నేపథ్యంలో రూపుదిద్దుకున్న ‘నో ఎంట్రీ’ చిత్రంలో ఆమె సరికొత్త పాత్రలో నటిస్తోంది. ఈ మూవీలో ఆండ్రియా ఎంతో సాహసంతో కూడిన యాక్షన్ థ్రిల్లర్ పాత్ర చేస్తోంది. ఇప్పటికే విడుదలైన ఫస్ట్లుక్ పోస్టర్స్కి మంచి రెస్పాన్స్ వచ్చింది. తాజాగా ‘నో ఎంట్రీ’ మూవీ ట్రైలర్ని రిలీజ్ చేశారు మేకర్స్.
ట్రైలర్ని గమనిస్తే… దట్టమైన అటవీ ప్రాంతానికి విహారయాత్రకు వెళ్ళిన కొంత మంది స్నేహితులు అడవిలోని కొండ శిఖరంలో ఉన్న లగ్జరీ విల్లాలో బస చేస్తారు. ఆ ఇంటిని క్రూరమైన అడవి కుక్కలు చుట్టుముడతాయి. ఆ కుక్కల బారి నుండి వారు ఏ విధంగా తప్పించుకున్నారన్నదే ఈ చిత్ర కథగా తెలుస్తోంది. ఎంతో థ్రిల్లింగ్గా, రోమాలు నిక్కబొడుచుకునేలా ఇందులోని సన్నివేశాలను తెరకెక్కించినట్టు దర్శకుడు ఆర్. అళగు కార్తీక్ వెల్లడించారు. జంబో సినిమాస్ బ్యానరులో శ్రీధర్ అరుణాచలం ఈ చిత్రాన్ని నిర్మించారు. అదవ్ కణ్ణదాసన్, రన్యా రావ్, మానస్, జయశ్రీ, జాన్వీ ఇతర కీలకపాత్రల్లో నటించారు. త్వరలోనే ఈ చిత్రం తెలుగు, తమిళ భాషలలో విడుదలకానుంది.
