Ameesha Patel: ‘ఆంటీ’ అంటూ ట్రోల్.. హార్దిక్‌తో లింకప్ రూమర్స్‌పై అమీషా స్ట్రాంగ్ కౌంటర్!

Ameesha Patel: టీమిండియా స్టార్ క్రికెటర్ హార్దిక్ పాండ్యా ఏదో ఒక నటితో డేటింగ్ చేస్తున్నాడనే పుకార్లు ఈ మధ్య నిరంతరం ప్రచారంలో ఉంటున్నాయి . ఇటీవల అతనికి 51 ఏళ్ల అమీషా పటేల్‌తో సంబంధం అంటగట్టారు నెటిజన్లు. వీరిద్దరి వీడియో ఒకటి బయటపడటంతో, సోషల్ మీడియాలో వారి సంబంధంపై చర్చలు మొదలయ్యాయి. టీమిండియా స్టార్ క్రికెటర్ హార్దిక్ పాండ్యా, బాలీవుడ్ నటి అమీషా పటేల్ కలిసి ఒక పార్టీలో కనిపించడంతో సోషల్ మీడియాలో ఒక్కసారిగా కొత్త రూమర్స్ మొదలయ్యాయి. ఆ పార్టీకి సంబంధించిన వీడియోలో అమీషా.. హార్దిక్‌ను తన స్నేహితులకు పరిచయం చేస్తూ కనిపించింది. ఈ సమయంలో ఆమె హార్దిక్ భుజంపై చేయి వేయడం సోషల్ మీడియా యూజర్ల కంట పడింది. అంతే.. ఇద్దరి మధ్య ఏదో ఉందంటూ నెటిజన్లు కామెంట్లు చేయడం మొదలుపెట్టారు.

అసలు ఈ వీడియోలో అంత ప్రత్యేకంగా ఏమీ లేకపోయినా, కొందరు నెటిజన్లు మాత్రం దానికి రొమాంటిక్ టచ్ ఇచ్చేశారు. ఒక యూజర్ హార్దిక్ భుజంపై అమీషా చేయి వేయడాన్ని చూపిస్తూ, రెడ్డిట్‌లో వస్తున్న రూమర్స్ నిజమేనంటూ పోస్ట్ చేశాడు. మరోవైపు కొందరు అమీషాను ‘ఆంటీ’ అంటూ కూడా ట్రోల్ చేశారు. దీంతో ఈ వ్యవహారం సోషల్ మీడియాలో మరింత వైరల్ అయింది. ఈ ట్రోలింగ్ అమీషా పటేల్ దృష్టికి వెళ్లడంతో ఆమె ఏ మాత్రం తగ్గలేదు. తన ఇన్‌స్టాగ్రామ్ స్టోరీలో ఆ పోస్టు స్క్రీన్‌షాట్‌ను షేర్ చేసి వ్యంగ్యంగా స్పందించింది. హార్దిక్ భుజంపై చేయి వేసిన తన చర్య నిజంగానే చాలా రొమాంటిక్‌గా ఉందంటూ సెటైర్ వేసింది. అంతేకాదు, తనకు తెలియని వ్యక్తి కూడా ఇలా అర్థం చేసుకోవడం ఆశ్చర్యంగా ఉందని, అతడికి కనీసం ఒక అమ్మాయి ఫ్రెండ్ కూడా లేదేమో అంటూ గట్టిగానే కౌంటర్ ఇచ్చింది.

దీంతో హార్దిక్, అమీషా మధ్య డేటింగ్ జరుగుతోందంటూ వచ్చిన ప్రచారానికి అమీషా తనదైన స్టైల్లో చెక్ పెట్టినట్టైంది. కేవలం ఒక ఫ్రెండ్లీ మూమెంట్‌ను పట్టుకుని ప్రేమాయణం అంటగట్టడం సరికాదని ఆమె రిప్లై స్పష్టం చేసింది. ప్రస్తుతం హార్దిక్ పాండ్యా మోడల్ మహీకా శర్మతో రిలేషన్‌లో ఉన్నట్లు వస్తున్న వార్తలు కూడా సోషల్ మీడియాలో చక్కర్లు కొడుతున్నాయి. ఇక అమీషా పటేల్ విషయానికి వస్తే.. 2023లో వచ్చిన ‘గదర్ 2’లో సకీనా పాత్రలో కనిపించిన ఆమె ఆ తర్వాత పెద్ద సినిమాల్లో పెద్దగా కనిపించలేదు. అయితే ఇప్పుడు హార్దిక్‌తో లింకప్ రూమర్స్ కారణంగా మరోసారి సోషల్ మీడియాలో హాట్ టాపిక్‌గా మారింది.