Remote Cleaning : వర్షాల్లో టీవీ రిమోట్ పనిచేయడం లేదా? ఈ 4 ట్రిక్స్‌తో కొత్తదానిలా మారుతుంది.!

Remote Cleaning : వర్షాకాలం ప్రారంభమైనప్పుడు గాలిలో తేమ (Humidity) గణనీయంగా పెరుగుతుంది. ఈ తేమ వాతావరణం బట్టలు, ఫర్నిచర్ లేదా ఎలక్ట్రానిక్ ఉపకరణాలను ప్రభావితం చేయడమే కాకుండా, ఇంట్లో రోజూ ఉపయోగించే టీవీ, ఏసీ రిమోట్‌లు పాడయ్యే అవకాశాలను కూడా పెంచుతుంది. తరచుగా రిమోట్‌లోని బటన్లు సరిగ్గా పనిచేయకపోవడం, స్పందించడానికి ఎక్కువ సమయం పట్టడం లేదా రిమోట్ పూర్తిగా ఆగిపోవడం వంటి సమస్యలు తలెత్తుతాయి. రిమోట్ లోపల ఎలక్ట్రానిక్ సర్క్యూట్ బోర్డులు, రబ్బరు కీప్యాడ్‌లు , బ్యాటరీ కాంటాక్ట్‌లు ఉండటం వల్ల గాలిలోని తేమ లోపలికి చేరి తుప్పు పట్టేలా చేస్తుంది. ఇలాంటి సమస్యలు వచ్చినప్పుడు కొత్త రిమోట్ కొనే ముందు కొన్ని సులభమైన పద్ధతులు పాటించడం ద్వారా రిమోట్ మన్నికను పెంచుకోవచ్చు.

ఐసోప్రొపైల్ ఆల్కహాల్‌తో బటన్లు శుభ్రం చేయడం

తేమ , నూనె మరకల వల్ల రిమోట్ బటన్ల లోపల దుమ్ము చేరుకుని బటన్లు బిగుసుకుపోతాయి. ఈ సమస్యను నివారించడానికి ముందుగా రిమోట్ నుంచి బ్యాటరీలను తీసివేయాలి. ఆ తర్వాత ఒక దూది ఉండను (కాటన్ స్వాబ్) 70-90% ఐసోప్రొపైల్ ఆల్కహాల్‌తో తడిపి, అదనపు ద్రవాన్ని పిండివేయాలి. ఈ దూదితో రిమోట్ బటన్ల ఉపరితలాన్ని, అంచులను మెల్లగా తుడుచుకుంటే దానికి అంటుకున్న మురికి, నూనె , గ్రీజు మరకలు సులభంగా తొలగిపోతాయి.

బ్యాటరీ కాంటాక్ట్‌లను చెక్ చేయడం

వర్షాకాలంలో రిమోట్ బ్యాటరీ కనెక్టర్లు తుప్పు పట్టే అవకాశం ఎక్కువగా ఉంటుంది. కాబట్టి ప్రతి కొన్ని వారాలకొకసారి రిమోట్ నుండి బ్యాటరీలను తీసివేసి లోపలి కాంటాక్ట్‌లను తనిఖీ చేయాలి. అక్కడ తెల్లటి లేదా ఆకుపచ్చని పొర ఏర్పడినట్లు కనిపిస్తే, పొడి గుడ్డతో లేదా ఐసోప్రొపైల్ ఆల్కహాల్ తడిపిన దూదితో మెల్లగా శుభ్రం చేయాలి. ఒకవేళ బ్యాటరీలు బాగా పాతవైతే వాటి స్థానంలో కొత్తవి వాడటం మంచిది.

బియ్యం ఉపయోగించి లోపలి తేమను తొలగించడం

రిమోట్ లోపల తేమ చేరి పనిచేయనప్పుడు బియ్యం వాడటం ఒక అద్భుతమైన ఇంటి చిట్కా. ‘రీసెర్చ్ గేట్’ అధ్యయనాల ప్రకారం, బియ్యం ఒక అద్భుతమైన సహజ హైగ్రోస్కోపిక్ (తేమను పీల్చుకునే) పదార్థం. ముందుగా రిమోట్ నుండి బ్యాటరీలను తీసివేసి, దానిని పొడి బియ్యంతో నింపిన డబ్బాలో లేదా జిప్-లాక్ బ్యాగ్‌లో ఉంచి 24 నుండి 48 గంటల పాటు అలాగే వదిలేయాలి. ఆ తర్వాత రిమోట్‌ను బయటకు తీసి, దానికి అంటిన బియ్యం రేణువులను బ్లోయర్ లేదా బ్రష్‌తో శుభ్రం చేస్తే లోపలి తేమ పూర్తిగా ఇంకిపోతుంది.

నిమ్మరసం, ఈనో పౌడర్ మిశ్రమం

టీవీ లేదా ఏసీ రిమోట్‌పై పేరుకుపోయిన మొండి మురికిని శుభ్రం చేయడానికి ఒక టేబుల్ స్పూన్ ఈనో పౌడర్‌ను, ఒక టేబుల్ స్పూన్ నిమ్మరసంతో కలిపి చిక్కటి పేస్ట్ లా తయారు చేసుకోవచ్చు. ఈ మిశ్రమంలో దూది ముంచి రిమోట్ బయటి భాగంపై అప్లై చేసి 5 నిమిషాల పాటు ఉంచాలి. ఆ తర్వాత మెత్తటి తడి గుడ్డ సహాయంతో మెల్లగా తుడుచుకుంటే రిమోట్ కొత్తదానిలా మెరుస్తుంది.

రిమోట్ శుభ్రం చేసేటప్పుడు వహించాల్సిన జాగ్రత్తలు

బ్యాటరీలు తీసివేయాలి: శుభ్రపరచడం ప్రారంభించే ముందు తప్పనిసరిగా బ్యాటరీలను తీసివేయాలి. దీనివల్ల సర్క్యూట్‌లు షార్ట్ సర్క్యూట్ అవ్వకుండా ఉంటాయి.

నీటిని నేరుగా చల్లవద్దు: రిమోట్‌పై నేరుగా నీటిని చల్లడం లేదా నీళ్లలో ముంచడం చేయకూడదు. ఇది లోపలి మదర్‌బోర్డ్‌ను పాడు చేస్తుంది.

టూత్‌బ్రష్ వినియోగం: బటన్ల అంచుల మధ్య ఉండే దుమ్మును తొలగించడానికి పొడి టూత్‌బ్రష్ లేదా టూత్‌పిక్‌ను ఉపయోగించవచ్చు.

ఆరనివ్వడం: శుభ్రం చేసిన తర్వాత రిమోట్‌ను కనీసం అరగంట పాటు ఆరనిచ్చి, ఆ తర్వాతే బ్యాటరీలు వేయాలి.

ప్లాస్టిక్ కవర్ వాడకం: ‘సెంటర్స్ ఫర్ డిసీజ్ కంట్రోల్ అండ్ ప్రివెన్షన్’ (CDC) ప్రకారం, రిమోట్‌ను ఒక ప్లాస్టిక్ కవర్‌తో కప్పడం వల్ల తేమ, దుమ్ము పడకుండా దాని జీవితకాలాన్ని పొడిగించవచ్చు.