Festival Recipes : రక్షా బంధన్ స్పెషల్.. ఇంట్లోనే సింపుల్‌గా కాజు కట్లీ రెడీ..!

Festival Recipes : తోబుట్టువుల మధ్య పవిత్రమైన అనురాగానికి, పదిలమైన బంధానికి ప్రతీక రక్షా బంధన్. శ్రావణ పౌర్ణమి వేళ జరుపుకునే ఈ పండుగ రోజున సోదరుడి చేతికి రాఖీ కట్టి, తీపి తినిపించడం మన సాంప్రదాయం. మరి ఈ రక్షా బంధన్ వేడుకల్లో బయటి స్వీట్లతో పనిలేకుండా, మీ చేతులతోనే అత్యంత శుభ్రంగా, సులభంగా , తక్కువ సమయంలో ‘కాజు కట్లీ’ (జీడిపప్పు కట్లీ) ఎలా తయారు చేయాలో ఇప్పుడు చూద్దాం.

కావలసిన పదార్థాలు

జీడిపప్పు – 2 కప్పులు, పంచదార – 1 కప్పు, నీళ్లు – 1 కప్పు, యాలకుల పొడి – 1/2 టీస్పూన్, నెయ్యి – 1 నుండి 2 టేబుల్ స్పూన్లు, బటర్ పేపర్ , అలంకరణకు సిల్వర్ ఫాయిల్.

తయారీ విధానం:

జీడిపప్పు పొడి తయారు చేయడం: మొదటగా 2 కప్పుల జీడిపప్పును మిక్సర్ జార్‌లో వేసి పొడి చేసుకోవాలి. అయితే మిక్సర్‌ను నిరంతరం తిప్పకుండా ఆన్-ఆఫ్ (Pulse) చేస్తూ మూడు నాలుగు విడతలుగా గ్రైండ్ చేయాలి. అలా చేయడం వల్ల జీడిపప్పు నుంచి నూనె విడుదల కాకుండా పొడిపొడిగా వస్తుంది. ఈ పొడిని జల్లించి పక్కన పెట్టుకోవాలి.

పాకం పటడం: ఒక బాణలిలో కప్పు పంచదార, కప్పు నీళ్లు పోసి పొయ్యి మీద పెట్టి కరిగించాలి. పంచదార పూర్తిగా కరిగి నీరు మరిగిన తర్వాత, పొయ్యిని సన్నని మంట మీద ఉంచి జల్లించిన జీడిపప్పు పొడిని వేసి బాగా కలపాలి.

మిశ్రమాన్ని ఉడికించడం: ఉండలు కట్టకుండా కలుపుతూ యాలకుల పొడి వేయాలి. మిశ్రమం దగ్గరపడి పాత్ర అంచుల నుండి విడిపోతున్న సమయంలో పొయ్యి కట్టేయాలి.

చదును చేయడం & కట్ చేయడం: ఒక పళ్లెంలో బటర్ పేపర్ పరిచి, దానికి కాస్త నెయ్యి రాసి ఈ మిశ్రమాన్ని వేయాలి. పైన మరొక బటర్ పేపర్ ఉంచి చపాతీ కర్ర లేదా గరిటెతో సమాన మందంలో చదును చేయాలి. మిశ్రమం కాస్త చల్లారాక పైన సిల్వర్ ఫాయిల్ అంటించి, కత్తితో డైమండ్ (వజ్రం) ఆకారంలో ముక్కలుగా కోసుకోవాలి. ఎంతో రుచికరమైన, మార్కెట్ స్టైల్ కాజు కట్లీ సిద్ధమైనట్లే! దీనిని గాలి చొరబడని డబ్బాలో భద్రపరుచుకుంటే కొన్ని రోజుల పాటు తాజాగా ఉంటుంది.

జీడిపప్పులోని ఆరోగ్య ప్రయోజనాలు:

కాజు కట్లీ రుచికరంగా ఉండటమే కాకుండా జీడిపప్పు వల్ల శరీరానికి మంచి పోషకాలు లభిస్తాయి. ఇందులో గుండె ఆరోగ్యానికి మేలు చేసే హెల్తీ ఫ్యాట్స్, కండరాల పుష్టికి సహాయపడే ప్లాంట్ ప్రోటీన్లు ఉంటాయి. అంతేకాకుండా రోగనిరోధక శక్తిని, రక్తప్రసరణను మెరుగుపరిచే మెగ్నీషియం, ఐరన్, జింక్ , కాపర్ వంటి ముఖ్యమైన ఖనిజాలు జీడిపప్పులో పుష్కలంగా లభిస్తాయి.