Homemade Natural Sunscreen: ఇక ఎండకు భయపడాల్సిన అవసరం లేదు..! ఇంట్లోనే ఇలా సన్‌స్క్రీన్‌ తయారు చేసుకోవచ్చు..

Homemade Natural Sunscreen: వేసవి కాలంలో మండుటెండలు తీవ్రంగా పెరుగుతున్న నేపథ్యంలో చర్మ సంరక్షణ ఎంతో అవసరం.. ఎండలో ఎక్కువసేపు గడిపితే చర్మం నల్లబడటం, ఎండదెబ్బ తగలడం, అకాల వృద్ధాప్యం వంటి సమస్యలు ఎదురయ్యే ప్రమాదం ఉంది. సాధారణంగా మార్కెట్లో లభించే సన్‌స్క్రీన్‌లు ఉపయోగకరంగా ఉన్నప్పటికీ, వాటిలోని రసాయనాలు ప్రతి ఒక్కరి చర్మానికి సరిపోవు. పైగా అవి ఖరీదైనవిగా కూడా ఉంటాయి. ఈ నేపథ్యంలో ఇంట్లోనే సహజ పదార్థాలతో సన్‌స్క్రీన్ తయారు చేసుకోవడం మంచి ప్రత్యామ్నాయం.

ప్రస్తుతం కాలుష్యం పెరగడం వల్ల ఓజోన్ పొర బలహీనపడుతూ, సూర్యుని హానికర UV కిరణాలు నేరుగా భూమిపై పడుతున్నాయి. అందువల్ల చర్మాన్ని రక్షించుకోవడం కోసం సన్‌స్క్రీన్ తప్పనిసరి అయింది. మీ వంటగదిలోనే లభించే పదార్థాలతో సులభంగా, తక్కువ ఖర్చుతో సహజ సన్‌స్క్రీన్‌లను తయారు చేసుకోవచ్చు.

* కలబంద మరియు కొబ్బరి నూనెతో సన్‌స్క్రీన్: కలబంద చర్మాన్ని చల్లబరుస్తుంది, కొబ్బరి నూనె తేలికపాటి సహజ రక్షణను ఇస్తుంది. రెండు టీస్పూన్ల కలబంద జెల్‌కు అర కప్పు కొబ్బరి నూనెతో పాటు కొద్దిగా వాల్‌నట్ నూనె కలిపి బాగా మిక్స్ చేస్తే, ఇది చర్మాన్ని తేమగా ఉంచుతూ ఎండ నుండి రక్షిస్తుంది.

* నువ్వుల నూనెతో సన్‌స్క్రీన్ స్ప్రే: నువ్వుల నూనెకు సూర్యరశ్మిని గ్రహించే లక్షణం ఉంది. నువ్వుల నూనెను రోజ్ వాటర్‌తో సమానంగా కలిపి స్ప్రే బాటిల్‌లో వేసుకుని ఉపయోగిస్తే, ఇది తేలికగా ఉండి చర్మంపై జిగటగా ఉండదు.

* షియా బటర్ మరియు జింక్ ఆక్సైడ్ మిశ్రమం: చిక్కటి సన్‌స్క్రీన్ కావాలనుకునేవారికి ఇది ఉత్తమ ఎంపిక. కొద్దిగా షియా బటర్‌ను వేడి చేసి, అందులో నాన్-నానో జింక్ ఆక్సైడ్ కలిపితే UV కిరణాల నుంచి రక్షణ కలిగించే పొర ఏర్పడుతుంది. అయితే, దీనిని తయారు చేసే సమయంలో జాగ్రత్తలు తీసుకోవాలి.

* గ్రీన్ టీ సన్ ప్రొటెక్షన్ స్ప్రే: గ్రీన్ టీ యాంటీ ఆక్సిడెంట్లతో నిండి ఉంటుంది. అర కప్పు నీటిలో గ్రీన్ టీ మరిగించి చల్లారనివ్వాలి. తర్వాత కొద్దిగా విటమిన్ E నూనె కలిపి స్ప్రేగా ఉపయోగించవచ్చు. ఇది ముఖ్యంగా జిడ్డు చర్మం ఉన్నవారికి బాగా సరిపోతుంది.

* బాదం నూనె మరియు తేనె మైనంతో సన్‌స్క్రీన్: నీటితో లేదా చెమటతో త్వరగా పోని సన్‌స్క్రీన్ కోసం తేనె మైనాన్ని కరిగించి, బాదం నూనెతో కలిపి చల్లారనివ్వాలి. ఇది చర్మంపై ఎక్కువసేపు నిలిచి నీటి నిరోధక రక్షణను ఇస్తుంది.

అయితే, ఇంట్లో తయారుచేసే సన్‌స్క్రీన్‌లు సహజమైనవి అయినప్పటికీ, వాటి SPF స్థాయిని ఖచ్చితంగా తెలియజేయడం కష్టం. కాబట్టి తీవ్ర ఎండలో ఎక్కువసేపు ఉండాల్సి వస్తే జాగ్రత్తగా ఉపయోగించాలి. అలాగే కొత్తగా ఉపయోగించే ముందు ప్యాచ్ టెస్ట్ చేయడం ఎంతో ముఖ్యమైనది.. మొత్తంగా ఇంట్లోనే సులభంగా తయారుచేసుకునే సహజ సన్‌స్క్రీన్‌లతో మీ చర్మాన్ని ఆరోగ్యంగా, కాంతివంతంగా ఉంచుకోవచ్చు.. కానీ, ఉపయోగించే ముందు.. ఓ సారి టెస్ట్ చేసుకోవడం బెటర్..