Summer: మట్టికుండలో నీళ్లు తాగితే కలిగే ఆరోగ్య ప్రయోజనాలు

వేసవి సీజన్ వచ్చేసింది. వేసవిలో ప్రతిఒక్కరూ ఫ్రిజ్‌ కొనుగోలు చేయడానికి మక్కువ చూపిస్తారు. ఫ్రిజ్‌లోని నీరు తాగాలని ఆరాటపడతారు. అయితే అలాంటి వారికి మట్టికుండ విలువ తెలియదు. సాధారణంగా మట్టికుండను పేదవాడి ఫ్రిజ్ అంటారు. మట్టికుండలో నిల్వ చేసిన నీళ్లు అమృతంలా ఉంటాయని మన పెద్దలు ఇప్పటికీ చెప్తూనే ఉంటారు. పూర్వకాలంలో మట్టికుండలోని నీళ్లను మాత్రమే అందరూ తాగేవారు. అందుకే అందరూ ఆరోగ్యంగా ఉండేవాళ్లు. కాలం మారే కొద్దీ మట్టి కుండలు కాకుండా జనాలు రిఫ్రిజిరేటర్లకు అలవాటు పడ్డారు. అయితే ఫ్రిజ్‌లలో నీరు తాగితే రోగాల బారిన పడటం ఖాయం. అదే మట్టికుండలో నీళ్లు తాగితే ఎలాంటి ఆరోగ్య సమస్యలు రావు. బాష్పీభవనం సూత్రంపై పని చేసే మట్టికుండలు ఎల్లప్పుడూ నీళ్లను చల్లగా ఉంచుతాయి.

మట్టి కుండ ఒక ప్యూరిఫైయర్ లాగా పనిచేస్తుంది. ఇది నీటిలో ఉండే మలినాలను, బ్యాక్టీరియా, ఫంగస్ వంటి వాటిని సహజసిద్ధంగా వడకట్టి ఎటువంటి సైడ్ ఎఫెక్ట్స్ లేని శుద్ధమైన మంచి నీటిని మనకు అందిస్తుంది. మట్టి కుండలో నీరు మన శరీర రోజువారీ కార్యకలాపాలు మరియు జీవక్రియ రేటును పెంచడానికి సహాయపడుతుంది. శరీరంలో మెటబాలిజం రేటును పెంచి ఆహారం సక్రమంగా జీర్ణమయలా చేసి శరీరంలో కొవ్వును పేరుకుపోకుండా చేస్తుంది. మట్టిలో ఉండే ఆల్కలిన్ స్వభావం నీటి ఆమ్లత్వంపై బాగా పనిచేస్తుంది. అందువల్ల శరీరంలో అవసరమైన పీహెచ్ లెవల్స్‌ను మట్టికుండలోని నీరు సమతుల్యం చేస్తుంది. శరీరంలో ఆమ్లత్వాన్ని తగ్గిస్తుంది. ఉదర సంబంధిత వ్యాధులను తగ్గించడంతోపాటు అజీర్తి, ఎసిడిటీ వంటి సమస్యలను తగ్గిస్తుంది.

వేసవికాలంలో మట్టికుండలోని వాటర్ తాగడం వల్ల వడదెబ్బ బారిన పడకుండా మనల్ని మనం కాపాడుకోవచ్చు. అంతేకాకుండా మట్టికుండలో నిల్వ చేయబడిన నీళ్లు చాలా ఎక్కువ రోజులు నిల్వ ఉంటాయి. జలుబు, దగ్గు, శ్వాసకోస, ఆస్తమా వ్యాధులతో బాధపడే వాళ్లతో పాటు చిన్న పిల్లలందరూ ఫ్రిజ్‌లో నీరు కంటే కుండలో వాటర్ తీసుకుంటే ఆరోగ్యానికి ఎంతో మంచిది. ఒక్క వేసవి కాలం లోనే కాకుండా సంవత్సరం పొడవునా మట్టి కుండలోని నీళ్ళను తీసుకోవచ్చు.