Sattu Laddu Recipe Without Sugar: పంచదార, పాకం లేకుండా హై ప్రోటీన్ సత్తు లడ్డూ.. ఇలా సింపుల్‌గా తయారు చేయండి!
- Follow Us :
-
-
Add as a preferred
source on google
Sattu Laddu Recipe Without Sugar: తీపి పదార్థాలు తినాలని అనిపించినా, ఆరోగ్యాన్ని దృష్టిలో పెట్టుకుని చక్కెరకు దూరంగా ఉండాలనుకునే వారికి సత్తు లడ్డూ మంచి ఎంపిక. పంచదార లేకుండా, పాకం చేయాల్సిన అవసరం లేకుండా, ఇంట్లోనే సులభంగా తయారు చేసుకునే ఈ లడ్డూలు రుచికరంగా ఉండటమే కాకుండా ప్రోటీన్‌తో నిండుగా ఉంటాయి. వేసవి కాలంలో ఉత్తర భారతదేశంలో సత్తు వినియోగం ఎక్కువగా ఉంటుంది. సాధారణంగా సత్తుతో శర్బత్ లేదా పానీయాలు తయారు చేస్తారు. అయితే, అదే సత్తుతో తియ్యటి లడ్డూలు కూడా చేయవచ్చు. ఇవి ఆరోగ్యకరమైన స్నాక్‌గా, పిల్లల నుంచి పెద్దల వరకు అందరికీ నచ్చేలా ఉంటాయి.
కావలసిన పదార్థాలు
సత్తు (వేయించిన శనగపిండి) – 2 కప్పులు
దేశీ నెయ్యి – 1 కప్పు (అవసరమైనంత)
యాలకుల పొడి – 1/2 టీస్పూన్
బాదం, జీడిపప్పు, పిస్తా – సన్నగా తరిగినవి
పొద్దుతిరుగుడు గింజలు, గుమ్మడి గింజలు – కొద్దిగా
ఓట్స్ – 1 కప్పు
ఖర్జూరాలు – అవసరమైనంత (తీపి కోసం)
తయారీ విధానం
ముందుగా సత్తును ఒక పెద్ద గిన్నెలో వేసి, గడ్డలు ఉంటే వడకట్టాలి. తర్వాత ఒక పాన్‌లో నెయ్యి వేసి వేడి చేయాలి. అందులో సత్తు పిండి వేసి తక్కువ మంటపై వేయించాలి. సత్తు నుంచి మంచి వాసన రావడం ప్రారంభమైన తర్వాత బాదం, జీడిపప్పు, పిస్తా, యాలకుల పొడి వేసి కలపాలి. పంచదారకు బదులుగా ఖర్జూరాలను మెత్తగా రుబ్బి పేస్ట్‌లా తయారు చేసుకుని ఈ మిశ్రమంలో కలపాలి. ఇలా చేయడం వల్ల లడ్డూలకు సహజమైన తీపి వస్తుంది. మిశ్రమం బాగా కలిసేంత వరకు వేయించాలి. ఇంకో పాన్‌లో కొద్దిగా నెయ్యి వేసి పొద్దుతిరుగుడు గింజలు, గుమ్మడి గింజలు, బాదం ముక్కలు స్వల్పంగా వేయించాలి. అందులో ఓట్స్ వేసి కలపాలి. తర్వాత ఈ మిశ్రమాన్ని పొడి చేసి సత్తు మిశ్రమంలో కలపాలి. మిశ్రమం కొద్దిగా చల్లారిన తర్వాత చేతితో గుండ్రంగా ఉండలు చేయాలి. అంతే.. పంచదార లేకుండా, హై ప్రోటీన్‌తో నిండిన సత్తు లడ్డూలు సిద్ధం.
ఆరోగ్య ప్రయోజనాలు
సత్తులో ప్రోటీన్, ఫైబర్ ఎక్కువగా ఉండటంతో శరీరానికి శక్తి అందుతుంది. ఖర్జూరాలు సహజ తీపిని ఇస్తాయి. డ్రై ఫ్రూట్స్, గింజలు పోషకాలు అందిస్తాయి. ఓట్స్ వల్ల జీర్ణక్రియ మెరుగుపడుతుంది. ఇవి ఉదయం అల్పాహారం తర్వాత లేదా సాయంత్రం స్నాక్‌గా తీసుకోవచ్చు. ఈ లడ్డూలను గాలి చొరబడని డబ్బాలో ఉంచితే 15 నుంచి 20 రోజుల వరకు నిల్వ ఉంటాయి. ఆరోగ్యకరమైన తీపి కావాలనుకునే వారు తప్పక ఈ సత్తు లడ్డూ ట్రై చేయండి.