Barley Upma Recipe: రెగ్యులర్‌ బ్రేక్ఫాస్ట్ బోర్ కొట్టిందా..? రుచికరమైన, ఆరోగ్యకరమైన బార్లీ ఉప్మా ట్రై చేయండి..
- Follow Us :
-
-
Add as a preferred
source on google
Barley Upma Recipe: ఉదయాన్నే ఏం బ్రేక్ఫాస్ట్ చేయాలా అని ఆలోచిస్తూ విసిగిపోతున్నారా? ప్రతిరోజూ ఇడ్లీ, దోసె, ఉప్మా, పూరీ లాంటి ఒకే రకమైన అల్పాహారం తిని బోర్ కొట్టిందా? అయితే మీ కోసం ఒక టేస్టీ మరియు హెల్తీ రెసిపీ సిద్ధంగా ఉంది. అదే బార్లీ ఉప్మా. ఇది రుచికరంగా ఉండటమే కాకుండా ఆరోగ్యానికి కూడా ఎంతో మేలు చేస్తుంది. ముఖ్యంగా ఉదయం హడావిడిలో కూడా చాలా తక్కువ సమయంలో సులభంగా తయారు చేసుకోవచ్చు.
బార్లీ సాధారణ ధాన్యం కాదు. ఇందులో పీచుపదార్థం (ఫైబర్) సమృద్ధిగా ఉండటం వల్ల జీర్ణక్రియ మెరుగుపడుతుంది. ఎక్కువసేపు ఆకలి వేయకుండా కడుపు నిండిన భావన కలిగిస్తుంది. దీంతో బరువు నియంత్రణలో కూడా సహాయపడుతుంది. అంతేకాకుండా సెలీనియం, మెగ్నీషియం, యాంటీఆక్సిడెంట్లు వంటి అనేక పోషకాలు బార్లీలో లభిస్తాయి. ఇవి శరీరానికి అవసరమైన శక్తిని అందించి ఆరోగ్యాన్ని కాపాడతాయి. ఉదయాన్నే త్వరగా అయ్యే హెల్తీ బ్రేక్ఫాస్ట్ కోసం చూస్తున్నవారికి బార్లీ ఉప్మా బెస్ట్ ఆప్షన్‌గా చెప్పొచ్చు. చిన్నపిల్లల నుంచి పెద్దల వరకు అందరూ ఇష్టంగా తినే ఈ రెసిపీని ఇప్పుడు ఎలా తయారు చేయాలో తెలుసుకుందాం.
కావలసిన పదార్థాలు
* 1 కప్పు బార్లీ గంజి
* 1/2 కప్పు క్యాప్సికమ్‌ (సన్నగా తరిగినది)
* 1/2 కప్పు ఉల్లిపాయ (సన్నగా తరిగినది)
* 1 క్యారెట్‌ (తరిగినది)
* 2 టీస్పూన్లు కొత్తిమీర
* 1 టీస్పూన్‌ మినప పప్పు
* చిటికెడు ఆవాలు
* 1/2 కప్పు వేయించిన వేరుశెనగలు
* 1 టీస్పూన్‌ నిమ్మరసం
* తగినంత ఉప్పు
* అవసరమైనంత నూనె
బార్లీ ఉప్మా తయారీ విధానం
ముందుగా బార్లీని శుభ్రంగా కడిగి 15 నుంచి 20 నిమిషాల పాటు నీటిలో నానబెట్టాలి. తర్వాత నీటిని వడకట్టి కుక్కర్‌లో వేసి రెండు విజిల్స్ వచ్చే వరకు ఉడికించాలి. ఇప్పుడు ఒక బాణలిలో కొద్దిగా నూనె వేసి వేడి చేయాలి. అందులో ఆవాలు వేసి చిటపటలాడిన తర్వాత మినప పప్పు వేసి స్వల్పంగా వేయించాలి. తరువాత సన్నగా తరిగిన ఉల్లిపాయ, క్యాప్సికమ్‌, క్యారెట్‌ వేసి కొద్దిసేపు వేగించాలి. కూరగాయలు కొద్దిగా మెత్తబడిన తర్వాత వేయించిన వేరుశెనగలు, తగినంత ఉప్పు వేసి బాగా కలపాలి. ఇప్పుడు ముందుగా ఉడికించిన బార్లీని ఇందులో వేసి 2 నుంచి 3 నిమిషాలు ఉడికించాలి. దీంతో అన్ని రుచులు బాగా కలుస్తాయి. చివరగా నిమ్మరసం, కొత్తిమీర చల్లి మరోసారి కలిపితే వేడి వేడి బార్లీ ఉప్మా రెడీ. దీనిని పెరుగు లేదా మీకు ఇష్టమైన చట్నీతో సర్వ్ చేస్తే మరింత రుచిగా ఉంటుంది. రుచితో పాటు ఆరోగ్యాన్ని కూడా అందించే ఈ బార్లీ ఉప్మాను మీరు కూడా ఒకసారి తప్పకుండా ట్రై చేయండి.