Ukraine War: ఉక్రెయిన్‌లో తుస్సుమన్న పాకిస్తానీ మందుగుండు..

Ukraine War:  ఉక్రెయిన్ యుద్ధంలో పాకిస్తానీ మందుగుండు సామాగ్రి తుస్సుమంటోంది. పాకిస్తాన్ ఆర్డినెన్స్ ఫ్యాక్టరీ తయారీలకు చెందిన 155mm మందుగుండు సామగ్రిలో నాణ్యతా సమస్యలు ఉన్నాయని ఒక ఉక్రేనియన్ ఆర్టిలరీ బ్రిగేడ్ కమాండర్ ఫిర్యాదు చేశారు. కొన్ని బ్యాచుల్లో నాణ్యతా సమస్యలు బయటపడ్డినట్లు వెల్లడించారు. దీని వల్ల ఫిరంగి బృందాలు వేర్వేరు తయారీదారులకు సంబంధించిన వేర్వేరు బాలిస్టిక్ డేటా ఉపయోగించాల్సి వస్తోందని చెప్పారు. ఈ పరిస్థితులు యుద్ధభూమిలో ఖచ్చితత్వం, సామర్థ్యంపై ప్రభావం చూపిస్తున్నట్లు తెలుస్తోంది. పాకిస్తాన్‌లో తయారైన M107 155mm షెల్స్‌ను ఉక్రెయిన్ రష్యాకు వ్యతిరేకంగా వాడుతోంది.

వివిధ తయారీదారులకు వివిధ బాలిస్టిక్ పట్టికలు ఉపయోగించాల్సి వస్తోందని, దీని వల్ల ఫైరింగ్ ముందు సిద్ధం కావడానికి అదనపు సమయం పట్టడంతో పాటు పొరపాటు అవకాశాలు కూడా పెరుగుతున్నట్లు తెలుస్తోంది. ఉక్రెయిన్ యుద్ధంలో పాకిస్తాన్ నుంచి మందుగుండు సామాగ్రి ఎగుమతి అవుతోంది. పాకిస్తాన్ ఆర్డినెన్స్ ఫ్యాక్టరీస్ చాలా కాలంగా మందుగుండును పెద్ద ఎత్తున సరఫరా చేస్తోందని యూఎస్ ఒప్పందాలు సూచిస్తున్నాయి.

ఇదిలా ఉంటే, ఈ వ్యాఖ్యలకు 1965 నాటి యుద్ధాన్ని జత చేస్తున్నారు. ఆ యుద్ధంలో జైసల్మేర్‌లోని తానోట్ ప్రాంతంలో పాకిస్తానీలు ప్రయోగించిన కొన్ని షెల్స్ పేలలేదని నివేదికలు చెబుతున్నాయి. ప్రస్తుతం ఉక్రెయిన్ యుద్ధంలో ఇలాంటి ఆరోపణలే వస్తున్నాయి. ఉక్రెయిన్ 7వ ఆర్టిలరీ బ్రిగేడ్ కమాండర్ విటాలి కొర్నియెంకో ఈ వ్యాఖ్యలు చేశారు.