Donald Trump: చమురు ధరలపై ట్రంప్ సంచలన ప్రకటన.. 2 డాలర్ల దిగువకు..!

Donald Trump: అమెరికా అధ్యక్షుడు డొనాల్డ్‌ ట్రంప్‌ చమురు ధరలపై సంచలన అంచనాలు వేస్తున్నారు.. అమెరికా, ఇరాన్ మధ్య కొనసాగుతున్న ఉద్రిక్తతల నేపథ్యంలో అంతర్జాతీయ చమురు ధరలు భారీగా పెరుగుతున్నాయి. ఈ సమయంలో డొనాల్డ్ ట్రంప్ మాత్రం యుద్ధంలో అమెరికా విజయం సాధించిన తర్వాత చమురు ధరలు వేగంగా పడిపోతాయని అంచనా వేశారు. గ్యాసోలిన్ ధరలు చివరికి గ్యాలన్‌కు 2 డాలర్ల కంటే దిగువకు చేరవచ్చని ఆయన పేర్కొన్నారు. ట్రంప్ తన ట్రూత్ సోషల్ పోస్టులో.. ఇరాన్‌తో యుద్ధం ముగిసి అమెరికా విజయం సాధించిన వెంటనే చమురు ధరలు భారీగా తగ్గుతాయని అన్నారు. మొదట గ్యాలన్‌కు 3 డాలర్లకు, ఆ తర్వాత 2 డాలర్ల కంటే తక్కువకు ధరలు పడిపోతాయని పేర్కొన్నారు. ఇరాన్ అణ్వాయుధాన్ని పొందకుండా అమెరికా అడ్డుకుంటుందని కూడా ఆయన స్పష్టం చేశారు.

భారీగా పెరిగిన అంతర్జాతీయ చమురు ధరలు

అమెరికా, ఇరాన్ మధ్య సైనిక ఉద్రిక్తతలు పెరగడంతో సోమవారం బ్రెంట్ క్రూడ్ ధర బ్యారెల్‌కు దాదాపు 97 డాలర్లకు చేరింది. గత ఐదు రోజుల్లో ఇది సుమారు 9 శాతం, గత నెలలో దాదాపు 19 శాతం పెరిగింది. ముఖ్యంగా హార్ముజ్ జలసంధి చుట్టూ జరుగుతున్న పరిణామాలు ప్రపంచ చమురు సరఫరాపై ఆందోళనలను పెంచుతున్నాయి. ప్రపంచంలో శాంతి సమయాల్లో రవాణా అయ్యే చమురులో దాదాపు ఐదో వంతు హార్ముజ్ జలసంధి మీదుగా వెళ్తుంది. దీంతో ఈ ప్రాంతంలో సైనిక ఘర్షణలు మరింత తీవ్రతరం అయితే ప్రపంచవ్యాప్తంగా చమురు సరఫరా, ధరలపై ప్రభావం పడే అవకాశం ఉంది.

ఇరాన్ హెచ్చరిక

ఇరాన్ పార్లమెంట్ స్పీకర్ మొహమ్మద్ బాఘెర్ గలీబాఫ్ అమెరికాను హెచ్చరించారు. ఇరాన్‌కు చెందిన చమురు, గ్యాస్ మౌలిక సదుపాయాలపై దాడులు చేస్తే తీవ్ర పరిణామాలు ఉంటాయని ఆయన పేర్కొన్నారు. తమ ఇంధన ఆస్తులపై దాడి జరిగితే ప్రతీకారం తప్పదని స్పష్టం చేశారు. మరోవైపు అమెరికా అధికారులు ఇరాన్ చమురు ట్యాంకర్ నౌకాదళం బలహీనంగా ఉందని పేర్కొన్నారు. ఇరాన్ నుంచి అమెరికా నౌకలపై దాడులు జరిగితే చమురు ట్యాంకర్లను లక్ష్యంగా చేసుకుంటామని హెచ్చరికలు జారీ చేశారు.

యుద్ధం ముగిస్తే ధరలు తగ్గుతాయా?

ప్రస్తుతం మధ్యప్రాచ్యంలో నెలకొన్న ఉద్రిక్తతలు అంతర్జాతీయ చమురు మార్కెట్లపై తీవ్ర ప్రభావం చూపుతున్నాయి. హార్ముజ్ జలసంధి వద్ద పరిస్థితులు సాధారణ స్థితికి వచ్చి, చమురు సరఫరాలో అంతరాయాలు తగ్గితే ధరలు తగ్గే అవకాశం ఉంది. అయితే ట్రంప్ చెప్పినట్లుగా గ్యాసోలిన్ ధరలు 2 డాలర్ల కంటే దిగువకు వస్తాయా అనేది యుద్ధ పరిస్థితులు, ప్రపంచ డిమాండ్, సరఫరా వంటి అనేక అంశాలపై ఆధారపడి ఉంటుంది.