Russia: రష్యా అధ్యక్షుడు వ్లాదిమిర్ పుతిన్ రానున్న కాలంలో నాటో కూటమిలోని ఏదో ఒక సభ్యదేశంపై దాడి చేసే అవకాశం ఉందని అమెరినా నిఘా సంస్థలు అంచనా వేస్తున్నాయి. నాటో ఐక్యతను పరీక్షించేందుకు ఈ దాడికి యత్నించే అవకాశం ఉందని వారు భావిస్తున్నారు. ఈ దాడి సైబర్ దాడులు, రహస్య ఆపరేషన్లు, తూర్పు నాటో సరిహద్దులో చిన్నస్థాయి సైనిక చొరబాటు రూపంలో ఉండొచ్చని అంచనా వేస్తున్నారు. ఈ విషయాలను వాల్ స్ట్రీట్ జర్నల్ నివేదించింది.
ఇప్పటి వరకు ఉక్రెయిన్ యుద్ధంలో రష్యా తలమునకలై ఉంది. దీని వల్ల నాటోతో నేరుగా తలపడేందుకు పుతిన్ వెనకాడుతారని అమెరికా భావించింది. అయితే, రష్యాపై పెరుగుతున్న ఒత్తిడి, ఉక్రెయిన్ డ్రోన్ దాడులు, యుద్ధంలో రష్యా వెనకబడిపోవడం వంటి పరిణామాలతో అమెరికా అంచనాల్లో మార్పులు వచ్చినట్లు నివేదిక వెల్లడించింది.
అమెరికా అధికారులు చెబుతున్నదాని ప్రకారం.. నాటో భూభాగాలను ఆక్రమించుకోవడం రష్యా లక్ష్యం కాదని, నాటో దేశాల మధ్య విభేదాలు సృష్టించడమే పుతిన్ లక్ష్యమని చెబుతున్నారు. గతంలో పోలాండ్, రొమేనియా లోకి రష్యా క్షిపణులు వెళ్లడం, గగనతలంలో డ్రోన్లు ప్రవేశించడం వంటివ ఘటనలను హెచ్చరిక సంకేతాలు పరిగణిస్తున్నారు. ఈ ఏడాది నుంచి 2029 మధ్య ఇలాంటి చర్యలకు రష్యా పాల్పడే అవకాశం ఉందని అమెరికన్ నిఘా వర్గాలు అంచనా వేస్తున్నాయి.
అయితే, రష్యా నేరుగా నాటో భూభాగంపై దాడి చేసే అవకాశం తక్కువగా ఉందని భావిస్తున్నారు. ఇదే జరిగితే ఇది నాటో లోని ఆర్టికల్ -5ను అమలు చేసే పరిస్థితికి దారి తీయొచ్చు. దీని ప్రకారం, నాటోలోని ఒక్క సభ్య దేశంపై దాడి చేసినా మొత్తం కూటమిపై దాడిగానే పరిగణించాల్సి ఉంటుంది. రష్యాపై చర్యలకు మొత్తం నాటో కూటమి ఏకమయ్యే అవకాశం ఉంటుంది. ఆర్టికల్ 5 స్థాయికి చేరుకోని దాడులను రష్యా నిర్వహిస్తుందని భావిస్తున్నారు. దీనికి 2007లో ఎస్టోనియాపై జరిగిన రష్యా సైబర్ దాడుల్ని ఉదాహరణగా చూపుతున్నారు.