Pakistan: పాకిస్తాన్ పరిస్థితి అస్సలు బాగా లేదు. అక్కడ ప్రభుత్వం, సైన్యం, న్యాయవ్యవస్థకు మధ్య తీవ్ర ఘర్షణ నెలకొంది. ఇప్పటికే ఆర్థిక సంక్షోభంతో దినదిన గండం నూరేళ్ల ఆయుష్షుగా ఆ దేశం బతికీడుస్తోంది. ఇది చాలదన్నట్లు ఇమ్రాన్ ఖాన్ వ్యవహారం పాక్ ను మరింత కల్లోలానికి గురిచేస్తోంది. ఇటీవల ఇమ్రాన్ ఖాన్ అరెస్ట్ తరువాత దేశ వ్యాప్తంగా ఆయన పార్టీ కార్యకర్తలు, మద్దతుదారులు రోడ్లపైకి వచ్చి ఆందోళనలు నిర్వహిస్తున్నారు. ఇమ్రాన్ ఖాన్ విడుదలైనా.. కూడా ఆందోళనలు సద్దుమణగడం లేదు.
Read Also: Bihar: ముస్లిం యువతితో బైక్‌పై వెళ్లడమే పాపమైంది.. హిందూ యువకుడిపై దాడి..
మరోవైపు న్యాయవ్యవస్థ ఇమ్రాన్ ఖాన్ కు మద్దతుగా వ్యవహరిస్తోందని పీఎం షహబాజ్ షరీఫ్ ప్రభుత్వం ఆరోపిస్తోంది. సుప్రీంకోర్టు ప్రధాన న్యాయమూర్తి అటా బండియాల్, ఇమ్రాన్ ఖాన్ కు మద్దతుగా ఉన్నారనే ఆరోపణలు వస్తున్నాయి. ఈ నేపథ్యంలో రాజకీయాల్లో సైన్యం తలదూర్చడం మంచిది కాదని పాక్ ఆర్మీకి ఇమ్రాన్ ఖాన్ వార్నింగ్ ఇచ్చాడు. ఈ పరిణామాలు పాకిస్తాన్ ను అంతర్యుద్ధం వైపు తీసుకెళ్లేలా కనిపిస్తోంది.
ఇదిలా ఉంటే లాహోర్ లోని ఇమ్రాన్ ఖాన్ నివాసం జమాన్ పార్క్ లో 30-40 మంది ఉగ్రవాదులు ఉన్నారని పాకిస్తాన్ పంజాబ్ రాష్ట్ర పోలీసులు అనుమానిస్తున్నారు. వారిని అప్పగించడానికి పాకిస్తాన్ తెహ్రీక్-ఇ-ఇన్సాఫ్ (పిటిఐ)కి 24 గంటల డెడ్ లైన్ విధించారు పోలీసులు. ఇంటెలిజెన్స్ నివేదిక ప్రకారం మాజీ ప్రధాని ఇమ్రాన్ ఖాన్ జమాన్ పార్క్ నివాసంలో ఉగ్రవాదులు ఆశ్రయం పొందుతున్నారని పంజాబ్ ఆపద్ధర్మ ప్రభుత్వం ఆరోపించింది. ఇదిలా ఉంటే దేశవ్యాప్తంగా ఇమ్రాన్ ఖాన్ పై 100కు పైగా కేసులు ఉన్నాయి, ఏ కేసులో కూడా ఇమ్రాన్ ఖాన్ ను అరెస్ట్ చేయకుండా మే 31 వరకు పాక్ సుప్రీంకోర్టు ఆదేశాలు ఇచ్చింది.
