Viral News: అదిరిపోయే జాబ్ ఆఫర్.. ఎలుకలను పట్టుకుంటే రూ.1.38 కోట్లు

Viral News: ప్రపంచ వ్యాప్తంగా ఎంతో మంది నిరుద్యోగులు జాబ్ ఆఫర్ల కోసం ఎదురుచూస్తున్నారు. అయితే కొన్ని జాబ్ ఆఫర్లు విచిత్రంగా ఉంటాయని చెప్పడానికి ఈ వార్తే నిదర్శనం. అమెరికాలోని న్యూయార్క్ మేయర్ ఎరిక్‌ ఆడమ్స్‌ ఇచ్చిన జాబ్ ఆఫర్ ఇప్పుడు సోషల్ మీడియాలో చర్చనీయాంశంగా మారింది. ఎలుకలు పట్టేందుకు ఆయన ఓ కొత్త పోస్టు సృష్టించారు. ఈ జాబ్ ఆఫర్ ద్వారా ఏడాదికి రూ.1.38 కోట్ల శాలరీ ఇస్తామని ప్రకటించారు. ఈ వివరాలను ఆడమ్స్‌ తన ట్విట్టర్‌లో పోస్ట్‌ చేశారు. ఎలుకలు అంటే తనకు అసహ్యమని ఆడమ్స్‌ పేర్కొన్నారు. ఈ మేరకు ‘న్యూయార్క్‌ నగరంలో కనికరం లేని ఎలుకలపై పోరాడే శక్తి మీకు ఉందా? మీరు ఎలుకలను చాకచక్యంగా పట్టుకోగలరా? అయితే, మీ కలల ఉద్యోగం రెడీగా ఉంది’ అని ట్వీట్‌ చేశారు.

Read Also: Sundar Pichai: గూగుల్ సీఈఓకి పద్మభూషణ్..

ఈ ఉద్యోగాన్ని డైరెక్టర్‌ ఆఫ్‌ రోడెంట్‌ మిటిగేషన్‌ అని పిలుస్తారని న్యూయార్క్ మేయర్‌ ఆఫీస్‌ ప్రకటన చేసింది. ఏడాదికి 170 వేల డాలర్ల వేతనం ఉంటుందని తెలిపింది. ఎలుకలను పట్టుకొనే సామర్థ్యం, దీర్ఘదృష్టి గల నాయకత్వ లక్షణాలు, సత్తువ ఉండాలని సూచించింది. ఈ ఉద్యోగంలో చేరిన వారు ఎలుకలను లేకుండా చేసేందుకు తగిన వ్యూహాలను అమలు చేయాల్సి ఉంటుందని ప్రకటనలో పేర్కొన్నారు. సక్రమంగా విధులు నిర్వహిస్తే 8.8 మిలియన్ న్యూయార్క్ వాసులను సంతోషంగా ఉంచగలుగుతారని అభిప్రాయపడ్డారు. అంతేకాకుండా నగరంలో పరిశుభ్రత కూడా పెరుగుతుందని తెలిపారు. ఈ ఉద్యోగం పట్ల ఆసక్తి ఉన్నవారు దరఖాస్తు చేసుకోవాలని సూచించారు.