Netanyahu vs Erdogan: ఇజ్రాయెల్-టర్కీ మధ్య మాటల యుద్ధం.. మధ్యప్రాచ్యంలో కొత్త టెన్షన్!

ఇప్పటికే ఇరాన్-ఇజ్రాయెల్ మధ్య భీకర యుద్ధం జరుగుతోంది. యుద్ధం కారణంగా ప్రపంచ దేశాలు అల్లాడిపోతున్నాయి. ఇలాంటి తరుణంలో ఇజ్రాయెల్-టర్కీ మధ్య మాటల యుద్ధం మంటలు రేపుతున్నాయి. ఈ ఘర్షణ ఎటువైపు దారి తీస్తుందోనని అంతర్జాతీయ నిపుణులు భయాందోళన వ్యక్తం చేస్తున్నారు.

అసలేం జరిగిందంటే..

బుధవారం టర్కీ పార్లమెంట్‌లో ఎంపీలను అధ్యక్షుడు ఎర్డోగాన్ ఉద్దేశించి ప్రసంగించారు.. ఇజ్రాయెల్ దాడులు లెబనాన్, సిరియాలో తీవ్ర స్థాయికి చేరుకున్నాయని.. అవి ఇప్పుడు టర్కీ భద్రతకే ప్రత్యక్ష ముప్పుగా మారాయని అన్నారు. సిరియా, లెబనాన్ భద్రతతో టర్కీ భద్రత ముడిపడి ఉందని పేర్కొన్నారు. తేకాకుండా ఆఫ్రికా దేశాలు, మధ్యధరా సముద్ర ప్రాంతంలో అస్థిరత సృష్టించేందుకు ఇజ్రాయెల్ ప్రయత్నిస్తోందని ఆరోపించారు. సైప్రస్ దీవిలో కూడా ఉద్రిక్తతలు రెచ్చగొట్టే ప్రయత్నాలు జరుగుతున్నాయని విమర్శించారు. తూర్పు మధ్యధరా ప్రాంతంలో టర్కీ లేదా టర్కిష్ సైప్రియట్‌ల హక్కులకు భంగం కలిగితే కఠినంగా ప్రతిస్పందిస్తామని హెచ్చరించారు. ప్రపంచ దేశాలు ఇజ్రాయెల్‌పై మరింత కఠిన వైఖరి అవలంబించాలని పిలుపునిచ్చారు. “ఇజ్రాయెల్‌ను అంతర్జాతీయ చట్టాల పరిధిలోకి తీసుకురావడం కొన్ని దేశాల బాధ్యత మాత్రమే కాదు, మానవాళి మొత్తం బాధ్యత” అని వ్యాఖ్యానించారు.

నాటో సభ్యదేశమైన టర్కీ.. గాజా, లెబనాన్, ఇరాన్‌పై ఇజ్రాయెల్ నిర్వహిస్తున్న సైనిక చర్యలను తీవ్రంగా వ్యతిరేకిస్తోంది. ఇప్పటికే టర్కీ ఇజ్రాయెల్‌తో అన్ని వాణిజ్య సంబంధాలను నిలిపివేసింది. అంతర్జాతీయ న్యాయస్థానాల్లో కూడా ఇజ్రాయెల్‌పై చర్యలు తీసుకోవాలని డిమాండ్ చేస్తోంది. అమెరికా-ఇరాన్ యుద్ధ పరిస్థితులకు కూడా ఇజ్రాయెల్ చర్యలే కారణమని టర్కీ ఆరోపిస్తోంది.

నెతన్యాహు కౌంటర్

ఎర్డోగాన్ వ్యాఖ్యలపై నెతన్యాహు ఘాటుగా స్పందించారు. సోషల్ మీడియా ప్లాట్‌ఫామ్ ‘ఎక్స్’లో ఘాటైన పోస్టు చేశారు. ఎర్డోగాన్‌ను “యూదు వ్యతిరేక నియంత”గా అభివర్ణించారు. కుర్దులపై అణచివేతకు పాల్పడుతున్నారని.. హమాస్‌కు మద్దతు ఇస్తున్నారని, రాజకీయ ప్రత్యర్థులను జైలుకు పంపిస్తున్నారని ఆరోపించారు. “నైతికత గురించి ఇజ్రాయెల్‌కు బోధించడానికి ఎర్డోగాన్ చివరి వ్యక్తి” అని నెతన్యాహు వ్యాఖ్యానించారు. ఇరాన్‌తో పాటు దాని అనుబంధ సంస్థలు మధ్యప్రాచ్యానికి, ప్రపంచానికే ముప్పుగా మారాయని పేర్కొంటూ… వాటిపై ఇజ్రాయెల్ రక్షణ దళాలు (IDF) కఠిన చర్యలు కొనసాగిస్తాయని స్పష్టం చేశారు. ఇద్దరు నేతల మధ్య తాజా వ్యాఖ్యల యుద్ధం మధ్యప్రాచ్య రాజకీయాల్లో ఉద్రిక్తతలను మరింత పెంచే అవకాశముందని అంతర్జాతీయ విశ్లేషకులు అభిప్రాయపడుతున్నారు.

 

The antisemitic dictator Erdoğan – who is committing genocide against the Kurds, supports the Hamas terrorist organization, oppresses his own people and imprisons political rivals – is the last person who can lecture the State of Israel on morality.

The State of Israel and the…

— Benjamin Netanyahu – בנימין נתניהו (@netanyahu) June 10, 2026