Nepal Flash Floods: నేపాల్‌ను వెంటాడుతున్న ప్రకృతి విపత్తు.. దార్చులాలో విరిగిపడిన కొండచరియలు

Nepal Flash Floods: ఇప్పటికే ఆకస్మిక వరదలతో తీవ్ర నష్టాన్ని ఎదుర్కొంటున్న నేపాల్‌ను మరో ప్రమాదం భయపెడుతోంది. దేశంలోని దార్చులా జిల్లాలో భారీ కొండచరియలు విరిగిపడటంతో చౌలానీ నదికి పాక్షికంగా అడ్డంకి ఏర్పడింది. దీంతో నదికి దిగువ ప్రాంతాల్లో ఆకస్మిక వరదలు సంభవించే అవకాశం ఉందని అధికారులు హెచ్చరించారు. ఆగస్టు 26న సంభవించిన భారీ ప్రకృతి విపత్తు నుంచి నేపాల్ ఇంకా కోలుకోకముందే ఈ కొత్త ప్రమాద హెచ్చరిక రావడం ఆందోళన కలిగిస్తోంది.

చౌలానీ నదికి అడ్డుగా కొండచరియలు

శుక్రవారం అపి హిమాల్ రూరల్ మునిసిపాలిటీ పరిధిలోని భట్టార్ ప్రాంతంలో భారీ కొండచరియలు విరిగిపడ్డాయి. పెద్ద మొత్తంలో మట్టి, రాళ్లు, శిథిలాలు నదిలోకి చేరడంతో చౌలానీ నది ప్రవాహానికి పాక్షికంగా అంతరాయం ఏర్పడింది. మరిన్ని కొండచరియలు విరిగిపడితే నది పూర్తిగా మూసుకుపోయే అవకాశం ఉందని దార్చులా జిల్లా పరిపాలనా కార్యాలయం హెచ్చరించింది. అదే జరిగితే నదిలో ఒక్కసారిగా నీటి ఒత్తిడి పెరిగి అడ్డంకి తెగిపోవడం ద్వారా దిగువ ప్రాంతాల్లో ఆకస్మిక వరదలు సంభవించే ప్రమాదం ఉందని అధికారులు తెలిపారు.

నదీ పరివాహక ప్రాంతాల్లో హై అలర్ట్

చౌలానీ నది ఒడ్డున, దిగువ ప్రాంతాల్లో నివసిస్తున్న ప్రజలు అప్రమత్తంగా ఉండాలని అధికారులు సూచించారు. అవసరమైన జాగ్రత్తలు తీసుకోవాలని హెచ్చరించారు. ప్రజలను అప్రమత్తం చేసేందుకు భద్రతా సిబ్బందిని కూడా రంగంలోకి దించారు. అత్యవసర పరిస్థితులు తలెత్తితే వెంటనే స్పందించేందుకు భద్రతా బలగాలు సిద్ధంగా ఉన్నాయి. సుదూరపశ్చిమ ప్రావిన్స్ ముఖ్యమంత్రి ఖగరాజ్ భట్టా స్థానిక అధికారులు, భద్రతా సంస్థలను అప్రమత్తంగా ఉండాలని ఆదేశించారు. ఎలాంటి అత్యవసర పరిస్థితి ఎదురైనా వెంటనే చర్యలు చేపట్టేందుకు సిద్ధంగా ఉండాలని సూచించారు. వరదలు, ప్రకృతి విపత్తులకు సంబంధించిన సహాయం కోసం అత్యవసర సంప్రదింపు నంబర్లను కూడా అధికారులు విడుదల చేశారు.

ప్రస్తుతం నది ప్రవాహం సాధారణ స్థాయిలోనే

నేపాల్ ఆర్మ్డ్ పోలీస్ ఫోర్స్ తెలిపిన వివరాల ప్రకారం.. ప్రస్తుతం చౌలానీ నదిలో నీటి ప్రవాహం సాధారణ స్థాయిలోనే ఉంది. అయితే పరిస్థితిని నిరంతరం పర్యవేక్షిస్తున్నారు. బలాంచ్‌లోని నేపాల్ చామేలియా హైడ్రోపవర్ సెక్యూరిటీ బేస్కు చెందిన సిబ్బందిని పరిస్థితిని పర్యవేక్షించేందుకు రంగంలోకి దించారు. నదిలో నీటి ప్రవాహంలో మార్పులు కనిపిస్తే సమీప ప్రాంతాల ప్రజలను వెంటనే అప్రమత్తం చేయనున్నారు. చౌలానీ నదిని చామేలియా నది అని కూడా పిలుస్తారు. ఈ నది అపి హిమాల్ ప్రాంతంలో పుట్టి చివరకు మహాకాళీ నదిలో కలుస్తుంది. మహాకాళీ నది కొంత మేరకు నేపాల్-భారత్ అంతర్జాతీయ సరిహద్దుగా కూడా ఉంది.

నేపాల్ వరదల్లో మృతుల సంఖ్య 1,344

ఇదిలా ఉండగా, ఆగస్టు 26న సంభవించిన భారీ ఆకస్మిక వరదల కారణంగా నేపాల్‌లో మృతుల సంఖ్య 1,344కు చేరింది. వరద ప్రభావిత ప్రాంతాల నుంచి మరిన్ని మృతదేహాలను వెలికితీయడంతో మృతుల సంఖ్య పెరిగింది. నేపాల్ పోలీసుల శనివారం విడుదల చేసిన వివరాల ప్రకారం ఇప్పటివరకు 843 మృతదేహాలను గుర్తించారు. వీరిలో 758 మంది పెద్దలు, 85 మంది చిన్నారులు ఉన్నారు.

కొత్త వరద హెచ్చరికతో మరింత ఆందోళన

ఇప్పటికే భారీ వరదలు, ఆకస్మిక వరదల కారణంగా వేలాది మంది నిరాశ్రయులయ్యారు. అనేక ప్రాంతాల్లో ఇళ్లు, రహదారులు, వంతెనలు, ఇతర మౌలిక వసతులు దెబ్బతిన్నాయి. ఈ పరిస్థితుల్లో దార్చులా జిల్లాలో కొండచరియలు విరిగిపడి నదికి అడ్డంకి ఏర్పడటం నేపాల్‌లో మరోసారి ఆందోళనకు కారణమైంది. ప్రస్తుతం నది ప్రవాహం సాధారణంగానే ఉన్నప్పటికీ, కొండచరియలు మరింతగా విరిగిపడే అవకాశం ఉండటంతో అధికారులు హై అలర్ట్ ప్రకటించారు.

A reminder that mountains have no borders.

A landslide was reported near Bhattad in Api Himal, Darchula, Nepal, today. Nearby riverside villages are advised to stay alert.

Sharing this as Nepal’s hills face another weather-related concern. 🙌🏼 pic.twitter.com/9fWmcHh6ra

— The Modern Himachal (@themodernhp) September 4, 2026