Pakistan: విదేశాలకు పాక్ అధికారుల వలస.. రక్షణమంత్రి సంచలన వ్యాఖ్యలు..

Pakistan:  పాకిస్తాన్‌లో ప్రభుత్వ ఉన్నతాధికారులు, ఉద్యోగంలో ఉండగానే విదేశాల్లో శాశ్వత నివాసాలను ఏర్పాటు చేసుకుంటున్నారని ఆ దేశ రక్షణ మంత్రి ఖవాజా ఆసిఫ్ ఆందోళన వ్యక్తం చేశారు. కెనడా, అమెరికా, బ్రిటన్‌తో పాటు పలు యూరప్ దేశాలకు పాకిస్తాన్ అధికారులు వలస వెళ్లిపోతున్నారని అన్నారు. ఈ పరిణామం దేశం పట్ల, తమ విధుల పట్ల అధికారులకు ఉన్న నిబద్ధతపై ప్రశ్నలు లేవనెత్తుతోందని వ్యాఖ్యానించారు.

గత కొన్నేళ్లుగా పలువురు అధికారులు విదేశాల్లో శాశ్వత నివాసం కోసం ప్లాన్ చేసుకుంటున్నారని ఆయన ఎక్స్ వేదికగా అన్నారు. ఉద్యోగంలో ఉన్నప్పుడే ఈ ఏర్పాట్లు చేసుకుంటున్నారని ఆరోపించారు. పాకిస్తాన్ బ్యూరోక్రాట్లకు పోర్చుగల్ ఇటీవలి కాలంలో ముఖ్యమైన గమ్యస్థానంగా మారిందని అన్నారు. విదేశాల్లో శాశ్వత నివాసాలు ఏర్పాటు చేసేందుకు అధికారులకు సహాయం చేసే వ్యక్తి పెద్ద మొత్తంలో డబ్బులు వసూలు చేసి పారిపోయినట్లు ఆసిఫ్ ఆరోపించారు. అయితే, ఆ వ్యక్తి వివరాలు, దానికి సంబంధించిన ఆధారాలు ఆయన బహిరంగంగా వెల్లడించలేదు.

ఈ వ్యాఖ్యలు మరోసారి పాకిస్తాన్‌లో సంచలనంగా మారాయి. ప్రభుత్వం, సైన్యం మధ్య సంబంధాలు మరోసారి చర్చనీయాంశంగా మారాయి. ప్రధాని షెహబాజ్ షరీఫ్ ప్రభుత్వంపై ఆర్మీ చీఫ్ అసిమ్ మునీర్ ప్రభావం పెరుగుతోందని నివేదికలు చెబుతున్న వేళ ఆసిఫ్ నుంచి ఈ వ్యాఖ్యలు వచ్చాయి.