Imran Khan: పాకిస్తాన్ మాజీ ప్రధాని ఇమ్రాన్ ఖాన్ పాకిస్తాన్లో దయనీయ పరిస్థితి ఎదుర్కొంటున్నారు. అవినీతి ఆరోపణలతో రావల్పిండిలోని అడియాలా జైలులో ఉన్న ఆయనకు కనీస చికిత్స కూడా పాక్ ప్రభుత్వం అందించడం లేదనే ఆరోపణ వస్తున్నాయి. మాజీ పాక్ కెప్టెన్ తన కుడి కంటిచూపును 80 శాతం కోల్పోయినట్లు నివేదికలు చెబుతున్నాయి.
ఇదిలా ఉంటే, ఇమ్రాన్ ఖాన్ కోసం సునీల్ గవాస్కర్, కపిల్ దేవ్ సహా మాజీ అంతర్జాతీయ క్రికెట్ కెప్టెన్ల బృందం పాకిస్తాన్ ప్రభుత్వానికి లేఖ రాసింది. మాజీ ప్రధాన మంత్రి మరియు ప్రపంచ కప్ విజేత కెప్టెన్ ఇమ్రాన్ ఖాన్కు తక్షణ మరియు తగినంత వైద్య సహాయం అందేలా, కస్టడీలో గౌరవంగా వ్యవహరించేలా చూడాలని కోరారు. ఫిబ్రవరి 17న విడుదల చేసిన ఈ ప్రకటనలో.. ఇమ్రాన్ ఆరోగ్యం జైలులో క్షీణించిందని, రెండున్నర సంవత్సరాలుగా అతని నిర్భంధ పరిస్థితులు తీవ్రంగా క్షీణించాయని వచ్చిన నివేదికలు తీవ్ర ఆందోళన కలిగిస్తున్నాయని పేర్కొంది.
Read Also: Ajit Pawar Plane Crash: అజిత్ పవార్ విమాన ప్రమాద కేసులో బిగ్ ట్విస్ట్! బ్లాక్ బాక్స్ సమాచారంపై..!
సునీల్ గవాస్కర్, కపిల్ దేవ్లతో సహా లేఖపై సంతకాలు చేసిన వారిలో మైఖేల్ అథర్టన్, అలన్ బోర్డర్, మైఖేల్ బ్రెయర్లీ, గ్రెగ్ చాపెల్, ఇయాన్ చాపెల్, బెలిండా క్లార్క్, డేవిడ్ గోవర్, కిమ్ హ్యూస్, నాజర్ హుస్సేన్, క్లైవ్ లాయిడ్, స్టీఫెన్ వా, జాన్ రైట్ ఉన్నారు. 1992 వరల్డ్ కప్ విజయంలో ఇమ్రాన్ ఖాన్ పాత్రను లేఖలో హైలెట్ చేశారు. ఇమ్రాన్ ఖాన్ క్రికెట్ చూసిన అత్యుత్తమ ఆల్ రౌండర్లు, కెప్టెన్లలో ఒకరని లేఖలో పేర్కొన్నారు. ఖాన్కు తక్షణ, నిరంతర వైద్య సహాయం, కుటుంబ సభ్యులు కలుసుకునే అవకాశం ఇవ్వాలని, మానవీయ నిర్బంధ పరిస్థితులు, చట్టపరమైన ప్రక్రియ హక్కులు పొందేలా చూడాలని పాకిస్తాన్ ప్రభుత్వాన్ని వారు కోరారు.
