flydubai Incident: ఫ్లై దుబాయ్ విమానాన్ని కాపాడిన భారత పైలట్.. 9/11 తరహా ప్రమాదం తప్పించిన హీరో!

flydubai Incident: దుబాయ్ నుంచి ఇజ్రాయిల్ లోని టెల్ అవీవ్ వెళ్తున్న ఫ్లై దుబాయ్ కూల్చే కుట్ర జరిగినట్లు తెలుస్తోంది. పైలట్లలో ఒకరు మరో పైలట్‌పై దాడి చేయడం సంచలనంగా మారింది. ఈ ఘర్షణతో విమానం ఆకాశం నుంచి అనూహ్యంగా కిందకు పడిపోవడం ప్రారంభమైంది. చివరకు అతికష్టంపై సౌదీ అరేబియాలోని తబూక్ విమానాశ్రయంలో ఎమర్జెన్సీ ల్యాండింగ్ చేశారు. విమానంలోని ప్రయాణికులంతా సురక్షితంగా బయటపడ్డారు.

ఇజ్రాయిల్ అధికారులు తెలిపిన వివరాల ప్రకారం.. కో-పైలట్, పైలట్‌పై కత్తితో దాడి చేసి, విమానాన్ని నియంత్రించేందుకు ప్రయత్నించినట్లు అనుమానిస్తున్నారు. ప్రయాణికుల్లో ఆఫ్-డ్యూటీలో ఉన్న పైలట్ల సహాయొంతో విమానం సురక్షితంగా ల్యాండ్ అయినట్లు తెలుస్తోంది.

రక్షించిన భారత పైలట్

ఇదిలా ఉంటే, ఇజ్రాయిల్‌కు చెందిన పలు మీడియా సంస్థలు విమానాన్ని కాపాడిన పైలట్ భారతదేశానికి చెందిన వ్యక్తి అని పేర్కొన్నాయి. మరికొన్ని న్యూస్ ఏజెన్సీలు భారత సంతతికి చెందిన యూఏఈ పైలట్ అని చెబుతున్నాయి. కో-పైలట్ దాడి చేసినా కెప్టెన్ ప్రతిఘటించడంతో పరిస్థితి అదుపులోకి వచ్చినట్లు నివేదికలు చెబుతున్నాయి. అయితే, దీనిపై అధికారిక ప్రకటన మాత్రం ఇంత వరకు రాలేదు. భారత కెప్టెన్ విమానాన్ని రక్షించడం ఇప్పుడు సంచలనంగా మారింది. ఘటన జరిగిన సమయంలో 180 మంది ప్రయాణికులు విమానంలో ఉన్నారు. వీరిలో 150 మంది ఇజ్రాయిలీ ప్రయాణికులు ఉన్నట్లు తెలుస్తోంది. ప్రయాణికుల్ని కాపాడిన భారత పైలట్ ఇప్పుడు హీరోగా మారారు.

ఒక్కసారిగా 14 వేల అడుగులు పడిపోయిన ఫ్లైట్..

ఘటన జరిగిన సమయంలో విమానం 30 సెకన్లలో దాదాపుగా 14,000 అడుగులు కిందకు దిగింది. ఈ సమయంలో విమానం నుంచి మొదటి సాధారణ ఎమర్జెన్సీ సిగ్నల్, ఆ తర్వాత ఏదో కుట్ర జరిగిందనే సిగ్నల్ వచ్చింది. దీంతో తొలుత హైజాక్ అనుమానాలు వ్యక్తమయ్యాయి. విమానాన్ని కూల్చడానికి కో-పైలట్ యత్నించినట్లు తెలుస్తోంది. కో-పైలట్ ఒమన్ జాతీయుడని సమాచారం. అమెరికాలో 9/11 దాడుల తరహాలోనే విమానాన్ని కూల్చడానికి కుట్ర పన్నినట్లు అనుమానాలు వ్యక్తమవుతున్నాయి.