Super-Earths: రెండు భారీ “భూ గ్రహాల”ను గుర్తించిన ఖగోళ శాస్త్రవేత్తలు
Astronomers Discovers 2 Super-Earths: అనంత విశ్వంలో భూమిలాంటి గ్రహాలను కనుక్కునేందుకు అనేక ఏళ్లుగా శాస్త్రవేత్తలు ప్రయత్నిస్తున్నారు. భూమి లాగే నివాసయోగ్యానికి అనుకూలంగా ఉండే గ్రహాలు, భూమి లాగే హాబిటేబుల్ జోన్ లో ఉండే గ్రహాలను గుర్తించేందకు ప్రయత్నిస్తున్నారు. అయితే ఇప్పటి వరకు కొన్ని ఎక్సో ప్లానెట్స్ ను ఖగోళ శాస్త్రవేత్తలు గుర్తించారు. భూమిని పోలిన భారీ భూ గ్రహాలను(సూపర్ ఎర్త్) గుర్తించారు. అయితే అవి పూర్తిగా మానవ ఆవాసానికి అనుకూలంగా లేవు. అక్కడ జీవం ఉందా..? లేదా..? అని గుర్తించలేకపోయారు.
ఇదిలా ఉంటే తాజాగా భూమికి 100 కాంతి సంవత్సరాల దూరంలో ఓ గ్రహం చుట్టూ తిరుగుతున్న భూమిని పోలిన గ్రహాలను శాస్త్రవేత్తలు కనుగొన్నారు. ఇందులో ఒకటి భూమి కన్నా 30 శాతం పెద్దదిగా ఉంది. ఇది తన మరగుజ్జు నక్షత్రం చుట్టూ కేవలం 2.7 ఎర్త్ డేస్ లోనే చుట్టూ తిరుగుతోంది. మరొక గ్రహం భూమికన్నా 40 శాతం పెద్దదిగా ఉంది. ఇది తన నక్షత్రం చుట్టూ కేవలం 8.5 భూమి రోజుల్లోనే కక్ష్యను పూర్తి చేస్తోంది. వీటికి ఎల్పీ 890-9బీ, ఎల్పీ 890-9సీగా పేర్లు పెట్టారు. అయితే ఇందులో రెండో గ్రహం తన మాతృ నక్షత్రానికి నివాసయోగ్యమైన జోన్ లో ఉందని శాస్త్రవేత్తలు వెల్లడించారు. ఈ రెండు గ్రహాలను నాసా, ట్రాన్సిటింగ్ ఎక్సోప్లానెట్ సర్వే శాటిలైట్(టీఈఎస్ఎస్) గుర్తించింది.
Read Also: Gender Equality: లింగ సమానత్వం సాధించడానికి మరో 300 ఏళ్లు.. యూఎన్ఓ నివేదిక
గ్రహాలు వాటి నక్షత్రాల ముందు నుంచి వెళ్లినప్పుడు వెలువడే కాంతిని విశ్లేషించి అవి నివాసానికి యోగ్యంగా ఉన్నాయా..? హబిటబుల్ జోన్ లో ఉన్నాయా.? అనే వివరాలను విశ్లేషిస్తుంటారు శాస్త్రవేత్తలు. గ్రహాల లక్షణాలు, స్వభావాన్ని గుర్తిస్తుంటారు. ప్రస్తుతం శాస్త్రవేత్తలు గుర్తించిన ఎక్సో ప్లానెట్స్ భూమి నుంచి కొన్ని వందల కాంతి సంవత్సరాల దూరంలో ఉన్నాయి. అంటే కాంతి వేగంతో సెకనుకు 3 లక్షల కిలోమీటర్ల వేగంతో ప్రయాణిస్తే కొన్ని వందల ఏళ్ల తరువాత ఆ గ్రహాలను చేరుకునే అవకాశం ఉంటుంది. ఇప్పడున్న టెక్నాలజీ ప్రకారం ఇది దాదాపుగా అసాధ్యం.