Breast Cancer: 17ఏళ్లకే బ్రెస్ట్ క్యాన్సర్.. ఈ లక్షణాలను నిర్లక్ష్యం చేయకండి!

మనకు బ్రెస్ట్ క్యాన్సర్ అంటే సాధారణంగా 50 ఏళ్లు దాటిన మహిళల్లో వచ్చే వ్యాధి అనే అభిప్రాయం ఉంటుంది. చిన్న వయసులో ఉన్నప్పుడు రొమ్ములో ఏదైనా గడ్డ కనిపించినా, అది హార్మోన్ల మార్పుల వల్ల వచ్చిందని భావిస్తుంటారు.

ముఖ్యంగా నెలసరి సమయంలో వచ్చే మార్పులుగా తీసుకుని పెద్దగా పట్టించుకోరు. కానీ బ్రెస్ట్ క్యాన్సర్ రావడానికి వయసుతో సంబంధం లేదని కొన్ని కేసులు గుర్తుచేస్తున్నాయి. ఏకంగా 17 ఏళ్ల వయసులో కూడా ఈ క్యాన్సర్ బయటపడిన సందర్భాలున్నాయి.

డాక్టర్ల ప్రకారం చిన్న వయసులోనే బ్రెస్ట్ క్యాన్సర్ బారిన పడుతున్న మహిళలు ఉన్నారు. కొందరికి 19 ఏళ్లకే ఈ వ్యాధి నిర్ధారణ కాగా, మరికొందరికి 22, 25 ఏళ్ల వయసులోనే క్యాన్సర్ బయటపడింది. అంటే బ్రెస్ట్ క్యాన్సర్ అనేది పెద్ద వయసు మహిళలకు మాత్రమే వచ్చే సమస్య అనే అపోహను వదిలేయాలి.

మరి ఏ లక్షణాలను అస్సలు నిర్లక్ష్యం చేయకూడదు? మొదటిది రొమ్ములో కొత్తగా గడ్డ కనిపించడం. నెలసరి సమయంలో హార్మోన్ల మార్పుల వల్ల కూడా గడ్డలు ఏర్పడవచ్చు. అయితే నెలసరి పూర్తయిన తర్వాత కూడా ఆ గడ్డ అలాగే ఉంటే వైద్యులను సంప్రదించాలి. ప్రతి గడ్డ క్యాన్సర్ అని భయపడాల్సిన అవసరం లేదు. కానీ పరీక్ష చేయించుకోకుండా అది సాధారణ సమస్య అని నిర్ణయించుకోవడం ప్రమాదకరం. రెండోది చనుమొనల్లో మార్పులు. వాటి ఆకారం మారడం, లోపలికి మళ్లడం లేదా సాధారణంగా లేని మార్పులు కనిపించడం వంటివి గమనించాలి. మూడోది చనుమొనల నుంచి అసాధారణంగా ద్రవాలు రావడం. ముఖ్యంగా ఎలాంటి కారణం లేకుండా స్రావాలు కనిపిస్తే నిర్లక్ష్యం చేయకూడదు.

నాలుగోది రొమ్ముల ఆకారంలో మార్పులు రావడం. ఒక రొమ్ము పరిమాణం లేదా ఆకారం అకస్మాత్తుగా మారడం, గతంలో లేని తేడాలు కనిపించడం వంటివి గమనించాలి. ఐదోది చర్మంలో మార్పులు. రొమ్ము చర్మంపై గుంతలు పడినట్లు కనిపించడం, చర్మం ఆకృతి మారడం వంటి లక్షణాలు కూడా వైద్య పరీక్షలు అవసరమయ్యే సంకేతాలే.

ఇక చిన్న వయసులో బ్రెస్ట్ క్యాన్సర్ వచ్చే ప్రమాదాన్ని పెంచే అంశాల్లో కుటుంబ చరిత్ర కూడా ఒకటి. కుటుంబంలో తల్లి, సోదరి లేదా ఇతర దగ్గరి బంధువులకు బ్రెస్ట్ క్యాన్సర్ లేదా అండాశయ క్యాన్సర్ వచ్చిన చరిత్ర ఉంటే మరింత అప్రమత్తంగా ఉండాలి. ముఖ్యంగా BRCA1, BRCA2 అనే జన్యువుల్లో మార్పులు ఉంటే ప్రమాదం పెరగవచ్చు. ఇలాంటి సందర్భాల్లో జన్యు పరీక్షలు, నిపుణుల కౌన్సెలింగ్ ద్వారా వ్యక్తిగతంగా ఎంత ప్రమాదం ఉందో తెలుసుకోవచ్చు. అయితే ఈ జన్యు మార్పులు ఉన్నంత మాత్రాన క్యాన్సర్ తప్పనిసరిగా వస్తుందని అర్థం లేదు. అంతేకాదు, పొగాకు వినియోగం, మద్యం సేవించడం, శారీరక శ్రమ లేకపోవడం, సరైన ఆహారం తీసుకోకపోవడం, నిద్ర సమస్యలు వంటి జీవనశైలి అంశాలు కూడా ఆరోగ్యపరంగా ఆందోళన కలిగించేవే. మరో ముఖ్యమైన విషయం ఏంటంటే, చిన్న వయసులో మహిళల్లో రొమ్ము కణజాలం దట్టంగా ఉంటుంది. దీనివల్ల కొన్ని స్కానింగ్ పరీక్షల్లో అసాధారణ మార్పులను గుర్తించడం కష్టమవుతుంది. అందుకే లక్షణాలు కొనసాగుతున్నప్పుడు మొదటి పరీక్షలో స్పష్టత రాకపోయినా వైద్యుల సలహా తీసుకోవడం ముఖ్యం.

చివరగా గుర్తుంచుకోవాల్సింది ఒక్కటే. బ్రెస్ట్ క్యాన్సర్ గురించి ఆలోచించడానికి 40 లేదా 50 ఏళ్లు వచ్చే వరకు ఎదురుచూడాల్సిన అవసరం లేదు. మీ శరీరంలో వచ్చే మార్పులను గమనించండి. ఏదైనా గడ్డ లేదా అసాధారణ మార్పు కొనసాగుతుంటే వైద్యులను సంప్రదించండి. ప్రతి మార్పు క్యాన్సర్ అని భయపడాల్సిన అవసరం లేదు. అదే సమయంలో చిన్న వయసు అనే కారణంతో ఏ లక్షణాన్నీ నిర్లక్ష్యం చేయకూడదు.