Money: జీతం పెరుగుతున్నా చేతిలో డబ్బు మిగలడం లేదా? మధ్యతరగతి ఎక్కువగా చేసే పొరపాటు ఇదే!

Money : కొన్ని సంవత్సరాల క్రితం కంటే ఇప్పుడు జీతం బాగానే పెరిగింది. ఉద్యోగంలో ప్రమోషన్లు వచ్చాయి. ఆదాయం కూడా ముందుకంటే ఎక్కువే. అయినప్పటికీ నెలాఖరుకు బ్యాంక్ ఖాతా చూస్తే పెద్దగా మార్పు కనిపించదు. జీతం పెరిగినా పొదుపు పెరగడమనేది ఉండదు. పొదుపు సంగతి అటుంచి కొందరికి అయితే అప్పులు కూడా తీరవు. ఈ పరిస్థితి ఎందుకు వస్తోంది? ఆదాయం పెరుగుతున్నా ఆర్థిక భద్రత ఎందుకు పెరగడం లేదు? చాలా మంది మధ్యతరగతి కుటుంబాలు గుర్తించని ఒక అలవాటు దీని వెనుక ప్రధాన కారణంగా ఉంటుందని ఆర్థిక నిపుణులు చెబుతుంటారు.

చాలా మంది చేసే పెద్ద పొరపాటు ఏమిటంటే ఆదాయం పెరిగిన వెంటనే జీవనశైలిని కూడా అదే స్థాయిలో పెంచేయడం. దీనినే ఆర్థిక ప్రపంచంలో లైఫ్ స్టైల్ ఇన్ ఫ్లేషన్ అని పిలుస్తారు. జీతం పెరిగితే వెంటనే ఖరీదైన ఫోన్ కొనడం, పెద్ద EMI తీసుకోవడం, అవసరం లేకపోయినా కొత్త సబ్‌స్క్రిప్షన్లు తీసుకోవడం, బయట ఖర్చులు పెంచడం వంటి మార్పులు నెమ్మదిగా ప్రారంభమవుతాయి. మొదట ఇవి చిన్న ఖర్చుల్లా కనిపించినా కాలక్రమంలో ఈ పొరపాట్లు ఆదాయంలో పెద్ద భాగాన్ని తినేస్తాయి.

ఉదాహరణకు ఒక వ్యక్తి నెలకు 40 వేల రూపాయలు సంపాదిస్తున్నప్పుడు 5 వేల రూపాయలు పొదుపు చేస్తున్నాడనుకుందాం. కొన్నేళ్ల తర్వాత జీతం 60 వేల రూపాయలకు పెరిగింది. అయితే అదే సమయంలో ఇంటి ఖర్చులు, EMIలు, షాపింగ్ ఖర్చులు కూడా పెరిగితే పొదుపు మాత్రం మళ్లీ 5 వేల రూపాయల దగ్గరే ఆగిపోతుంది. ఆదాయం పెరిగినా ఆర్థిక పరిస్థితి మాత్రం పెద్దగా మెరుగుపడదు.

మధ్యతరగతి కుటుంబాల్లో మరో సమస్య పోలికల సంస్కృతి. బంధువులు ఏ కారు కొనుగోలు చేశారు, సహోద్యోగి ఏ ఫోన్ వాడుతున్నాడు, పొరుగువారు ఎక్కడికి టూర్ వెళ్లారు వంటి విషయాలు చాలా మందిపై ప్రభావం చూపుతాయి. మన అవసరాల కంటే ఇతరుల జీవనశైలిని అనుసరించాలనే ప్రయత్నం అనవసర ఖర్చులకు దారితీస్తుంది. ఈ ఖర్చులు అప్పుడప్పుడు ఆనందాన్ని ఇవ్వొచ్చు కానీ దీర్ఘకాలిక సంపదను నిర్మించడంలో పెద్దగా ఉపయోగపడవు.

ఆర్థిక భద్రత అనేది కేవలం ఎక్కువ సంపాదించడంపై ఆధారపడి ఉండదు. సంపాదించిన డబ్బులో ఎంత భాగాన్ని నిలుపుకుంటున్నామన్నదానిపైనే ఆధారపడిఉంటుంది. నెలకు లక్ష రూపాయలు సంపాదించే వ్యక్తి కంటే యాభై వేల రూపాయలు సంపాదించి క్రమం తప్పకుండా పొదుపు చేసే వ్యక్తి భవిష్యత్తులో మరింత బలమైన ఆర్థిక స్థితిలో ఉండే అవకాశం ఉంటుంది.

అందుకే జీతం పెరిగిన ప్రతిసారి ఖర్చులు పెంచే ముందు ఒక నియమం పెట్టుకోవడం మంచిది. అదనంగా వచ్చిన ఆదాయంలో కొంత భాగాన్ని నేరుగా పొదుపుకు కేటాయించాలి. మిగిలిన మొత్తంతోనే లైఫ్ స్టైల్ లో మార్పులు చేసుకోవాలి. ఇలా చేస్తే ఆదాయం పెరిగే కొద్దీ సంపద కూడా పెరుగుతుంది.

నిజానికి చాలా మంది డబ్బు సంపాదించలేక ఇబ్బందులు పడటం లేదు. సంపాదించిన డబ్బును సరైన దిశలో నిర్వహించలేక ఇబ్బందులు పడుతున్నారు. జీతం పెరిగిన ప్రతిసారి జీవనశైలి పెంచడం కన్నా ఆర్థిక స్వేచ్ఛను పెంచడంపై దృష్టి పెడితేనే భవిష్యత్తులో నిజమైన భద్రత లభిస్తుంది. చేతిలోకి వచ్చే డబ్బు ఎంత అన్నది ఒక విషయం అయితే, చివరకు మన దగ్గర మిగిలే డబ్బే మన ఆర్థిక స్థితిని నిర్ణయిస్తుంది.