డిజిటల్ లావాదేవీలను మరింత విస్తృతం చేయాలని ఆర్బీఐ నిర్ణయించింది. యూనిఫైడ్ పేమెంట్స్ ఇంటర్ ఫేస్ ఖాతాలకు క్రెడిట్ కార్డులను కూడా అనుసంధానించేందుకు అనుమతి ఇవ్వనున్నట్లు ప్రకటించింది. రూపే కార్డులతో ఈ విధానాన్ని ప్రారంభించనున్నట్లు ఆర్బీఐ గవర్నర్ శక్తికాంతదాస్ వెల్లడించారు. దీని వల్ల వినియోగదారులు మరింత సులువుగా పేమెంట్స్ చేసుకునే వీలుంటుందని ఆర్బీఐ అభిప్రాయపడింది. ఇందుకు అవసరమైన వ్యవస్థను మరింత మెరుగుపరచాల్సి ఉందని చెప్పింది. యూపీఐలతో క్రెడిట్ కార్డుల అనుసంధానానికి సంబంధించి నేషనల్ పేమెంట్స్ కార్పొరేషన్ ఆఫ్ ఇండియాకు ఆదేశాలు ఇవ్వనున్నట్లు వెల్లడించింది.
ప్రస్తుతం డెబిట్ కార్టులను మాత్రమే యూపీఐలతో అనుసంధానించే వీలుంది. ఖాతాదారుల సేవింగ్స్ అకౌంట్ నుంచి యూపీఐ ద్వారా చెల్లింపులు జరుగుతున్నాయి. ఈ నేపథ్యంలో సేవలను మరింత విస్తృతం చేసేందుకుగానూ ఆర్బీఐ ఈ నిర్ణయం తీసుకుంది. దేశంలో ప్రస్తుతం 26 కోట్ల మంది యూపీఐ యూజర్లు ఉన్నారు. దేశంలో డిజిటల్ లావాదేవీల్లో యూపీఐ కీలక పాత్ర పోషిస్తోంది. మే నెలలో యూపీఐ ద్వారా 10.40 లక్షల కోట్ల విలువైన 594.63 కోట్ల లావాదేవీలు జరిగినట్లు ఆర్బీఐ ప్రకటించింది. తాజాగా క్రెడిట్ కార్డులను కూడా యూపీఐకి అనుసంధానించడంతో లావాదేవీలు మరింత పెరిగే అవకాశం ఉంది.
