India Unemployment Rate 2026: దేశంలో నిరుద్యోగం తగ్గుముఖం.. 5.1 శాతానికి పడిపోయిన నిరుద్యోగ రేటు!

India Unemployment Rate 2026: దేశంలో నిరుద్యోగ సమస్యపై కొంత ఊరట కలిగించే గణాంకాలు వెలువడ్డాయి. 2026 జూలై నుంచి సెప్టెంబర్ త్రైమాసికం మధ్య దేశంలో నిరుద్యోగ రేటు 5.1 శాతానికి తగ్గింది. అంతకుముందు ఏప్రిల్ నుంచి జూన్ త్రైమాసికంలో ఈ రేటు 5.4 శాతంగా నమోదైంది. గత ఏడాది ఇదే త్రైమాసికంలో నిరుద్యోగ రేటు 5.2 శాతంగా ఉంది. తాజాగా విడుదలైన గణాంకాలు దేశంలో ఉపాధి పరిస్థితుల్లో కొంత మెరుగుదల కనిపిస్తోందని సూచిస్తున్నాయి. ముఖ్యంగా గ్రామీణ ప్రాంతాల్లో నిరుద్యోగం తగ్గడం, మహిళల శ్రామిక శక్తి భాగస్వామ్యం పెరగడం ఈ నివేదికలో కీలక పరిణామాలుగా నిలిచాయి. అయితే పట్టణ ప్రాంతాల్లో నిరుద్యోగ రేటు స్వల్పంగా పెరిగింది. జాతీయ గణాంకాల కార్యాలయం (NSO) మంగళవారం విడుదల చేసిన పీరియాడిక్ లేబర్ ఫోర్స్ సర్వే (PLFS) గణాంకాల్లో ఈ వివరాలు వెల్లడయ్యాయి.

మహిళల శ్రామిక శక్తి భాగస్వామ్యంలో పెరుగుదల

తాజా నివేదికలో ప్రధానంగా కనిపించిన అంశం మహిళల శ్రామిక శక్తి భాగస్వామ్యం పెరగడం. 15 సంవత్సరాలు, అంతకంటే ఎక్కువ వయస్సు ఉన్న మహిళల్లో పని చేస్తున్నవారు లేదా పని కోసం ప్రయత్నిస్తున్న వారి శాతం పెరిగింది. 2026 ఏప్రిల్-జూన్ త్రైమాసికంలో మహిళల లేబర్ ఫోర్స్ పార్టిసిపేషన్ రేట్ (LFPR) 33.2 శాతంగా ఉండగా, జూలై-సెప్టెంబర్ త్రైమాసికంలో 34.7 శాతానికి చేరింది. మహిళలు ఉపాధి రంగంలోకి మరింతగా అడుగుపెడుతున్నారని ఈ గణాంకాలు సూచిస్తున్నాయి.

గ్రామాల్లో నిరుద్యోగం తగ్గింది.. నగరాల్లో స్వల్ప పెరుగుదల

గ్రామీణ, పట్టణ ప్రాంతాల నిరుద్యోగ గణాంకాలను పరిశీలిస్తే భిన్నమైన పరిస్థితులు కనిపిస్తున్నాయి. గ్రామీణ ప్రాంతాల్లో ఏప్రిల్-జూన్ త్రైమాసికంలో 4.8 శాతంగా ఉన్న నిరుద్యోగ రేటు జూలై-సెప్టెంబర్ నాటికి 4.3 శాతానికి తగ్గింది. మరోవైపు పట్టణ ప్రాంతాల్లో నిరుద్యోగ రేటు 6.7 శాతం నుంచి స్వల్పంగా పెరిగి 6.8 శాతానికి చేరింది.

పురుషులు, మహిళల వారీగా నిరుద్యోగ రేటు వివరాలు ఇలా ఉన్నాయి.

గ్రామీణ పురుషుల్లో నిరుద్యోగం 4.7 శాతం నుంచి 4.4 శాతానికి తగ్గింది.
పట్టణ పురుషుల్లో నిరుద్యోగం 6.2 శాతం నుంచి 6.1 శాతానికి తగ్గింది.
పట్టణ మహిళల్లో నిరుద్యోగం 9 శాతం నుంచి 8.8 శాతానికి తగ్గింది.

గ్రామాల్లో స్వయం ఉపాధి పెరుగుదల

గ్రామీణ ప్రాంతాల్లో స్వయం ఉపాధి పొందుతున్న వారి సంఖ్యలో కూడా పెరుగుదల నమోదైంది. ఏప్రిల్-జూన్ 2026 త్రైమాసికంలో గ్రామీణ ప్రాంతాల్లో పనిచేస్తున్న వారిలో 61.4 శాతం మంది స్వయం ఉపాధి పొందుతున్నవారే. అయితే జూలై-సెప్టెంబర్ త్రైమాసికంలో ఈ వాటా 62.7 శాతానికి పెరిగింది. వ్యవసాయం, చిన్న వ్యాపారాలు, సొంత వృత్తులు వంటి రంగాల్లో స్వయం ఉపాధి పొందుతున్న వారి వాటా పెరిగినట్లు ఈ గణాంకాలు సూచిస్తున్నాయి.

పట్టణాల్లో రెగ్యులర్ ఉద్యోగాలు పెరిగాయి

పట్టణ ప్రాంతాల్లో క్రమబద్ధమైన వేతన ఉద్యోగాలు పొందుతున్న వారి వాటా కూడా స్వల్పంగా పెరిగింది. ఏప్రిల్-జూన్ త్రైమాసికంలో పట్టణ ప్రాంతాల్లో రెగ్యులర్ వేతన ఉద్యోగుల వాటా 49.3 శాతంగా ఉండగా, జూలై-సెప్టెంబర్ త్రైమాసికంలో 49.6 శాతానికి చేరింది. అదే సమయంలో గ్రామీణ, పట్టణ ప్రాంతాల్లో రోజువారీ కూలీ పనులు చేస్తున్న వారి వాటా తగ్గింది.

గ్రామీణ ప్రాంతాల్లో దినసరి కూలీల వాటా 21.7 శాతానికి తగ్గింది.
పట్టణ ప్రాంతాల్లో దినసరి కూలీల వాటా 10.7 శాతానికి పడిపోయింది.

ఉపాధి గణాంకాల్లో కీలక మార్పులు

తాజా PLFS నివేదిక ప్రకారం దేశంలో మొత్తం నిరుద్యోగ రేటు 5.1 శాతానికి తగ్గడం, గ్రామీణ ప్రాంతాల్లో ఉపాధి పరిస్థితులు మెరుగుపడటం, మహిళల శ్రామిక శక్తి భాగస్వామ్యం పెరగడం సానుకూల పరిణామాలుగా కనిపిస్తున్నాయి. అయితే పట్టణ ప్రాంతాల్లో నిరుద్యోగం స్వల్పంగా పెరగడం, స్వయం ఉపాధి పెరుగుదలతో పాటు ఉద్యోగాల నాణ్యత, ఆదాయ స్థిరత్వం వంటి అంశాలను కూడా పరిశీలించాల్సిన అవసరం ఉంది.