India Retail Inflation Rises: సామాన్యులకు ధరల సెగ.. సెప్టెంబర్‌లో పెరిగిన రిటైల్ ద్రవ్యోల్బణం..

India Retail Inflation Rises: మార్కెట్‌లో ఏ వస్తువు కొనబోయినా.. ధరలు భగ్గుమంటున్నాయి.. ఈ నేపథ్యంలో దేశంలో రిటైల్ ద్రవ్యోల్బణం మరోసారి పెరిగింది. ఆహార పదార్థాల ధరలు పెరగడంతో సెప్టెంబర్‌లో వినియోగదారుల ధరల సూచీ (CPI) ఆధారిత రిటైల్ ద్రవ్యోల్బణం 5.54 శాతానికి చేరింది. ఆగస్టు నెలలో ఇది 4.83 శాతంగా నమోదైంది. దీంతో నెల వ్యవధిలో ద్రవ్యోల్బణం పెరిగినట్లు ప్రభుత్వ గణాంకాలు వెల్లడించాయి. కేంద్ర గణాంకాలు, కార్యక్రమాల అమలు మంత్రిత్వ శాఖ (MoSPI) పరిధిలోని జాతీయ గణాంకాల కార్యాలయం (NSO) విడుదల చేసిన వివరాల ప్రకారం.. సెప్టెంబర్‌లో గ్రామీణ ప్రాంతాల్లో రిటైల్ ద్రవ్యోల్బణం 6.08 శాతంగా నమోదైంది. పట్టణ ప్రాంతాల్లో ఇది 4.88 శాతంగా ఉంది. పట్టణ ప్రాంతాలతో పోలిస్తే గ్రామీణ ప్రాంతాల్లో ద్రవ్యోల్బణం అధికంగా నమోదైంది.

జనవరిలో విడుదల చేసిన కొత్త సూచీ సిరీస్‌లో సెప్టెంబర్ ద్రవ్యోల్బణం అత్యధిక స్థాయికి చేరినట్లు గణాంకాలు సూచిస్తున్నాయి. ముఖ్యంగా ఆహార పదార్థాల ధరల పెరుగుదల మొత్తం ద్రవ్యోల్బణంపై ప్రభావం చూపింది. నిత్యావసర వస్తువుల ధరల్లో మార్పులు సామాన్య కుటుంబాల నెలవారీ ఖర్చులపై ప్రభావం చూపే అవకాశం ఉంది. ఆగస్టులో 4.83 శాతంగా ఉన్న ద్రవ్యోల్బణం సెప్టెంబర్‌లో 5.54 శాతానికి పెరగడం ధరల పరిస్థితిపై మరోసారి దృష్టి సారించేలా చేసింది. గ్రామీణ, పట్టణ ప్రాంతాల్లో నమోదైన గణాంకాలు దేశవ్యాప్తంగా జీవన వ్యయంపై ఆహార ధరల ప్రభావాన్ని తెలియజేస్తున్నాయి.