Big Relief: యుద్ధం వేళ కేంద్రం బిగ్ రిలీఫ్.. 6 నెలల పాటు EMI కట్టక్కర్లేదు..?!

భారత ఆర్థిక వ్యవస్థకు వెన్నెముకగా నిలిచే సూక్ష్మ, చిన్న, మధ్య తరహా పరిశ్రమలకు (MSMEలు).. ఎగుమతిదారులకు ఊరటనిచ్చే దిశగా కేంద్ర ప్రభుత్వం అడుగులు వేస్తోంది. ప్రపంచవ్యాప్తంగా నెలకొన్న అనిశ్చిత పరిస్థితులు, పెరుగుతున్న ఇంధన ధరల వల్ల ఇబ్బందులు పడుతున్న వ్యాపారాలకు సహాయం చేయడానికి 3 నుంచి 6 నెలల పాటు రుణ వాయిదాల చెల్లింపు నిలిపివేత (Loan Moratorium) కల్పించే అంశాన్ని ప్రభుత్వం పరిశీలిస్తున్నట్లు తెలుస్తోంది.

ఎందుకు ఈ నిర్ణయం..?
ప్రస్తుతం ప్రపంచవ్యాప్తంగా భౌగోళిక రాజకీయ ఉద్రిక్తతలు పెరిగాయి. ముఖ్యంగా ఇరాన్ వంటి దేశాల్లో నెలకొన్న అస్థిరత కారణంగా అంతర్జాతీయ మార్కెట్‌లో ఇంధన ధరలు ఆకాశాన్ని తాకుతున్నాయి. దీనివల్ల వస్తువుల రవాణా ఖర్చులు పెరగడమే కాకుండా, సరఫరా గొలుసు దెబ్బతింటోంది. ఈ ప్రభావం నేరుగా మన దేశంలోని చిన్న పరిశ్రమలపై పడుతోంది. ఉత్పత్తి ఖర్చులు పెరగడం, చేతిలో నగదు కొరత ఏర్పడటంతో వ్యాపారస్తులు బ్యాంక్ రుణాలను సకాలంలో చెల్లించలేక ఇబ్బందులు పడుతున్నారు.

మారటోరియం అంటే ఏమిటి..?
మారటోరియం అంటే నిర్ణీత కాలం పాటు అప్పు తీసుకున్న వారు తమ నెలవారీ వాయిదాలను (EMIs) చెల్లించకుండా వెసులుబాటు కల్పించడం. ప్రభుత్వం 3 నుంచి 6 నెలల పాటు ఈ సౌకర్యాన్ని ఇస్తే, ఆ కాలంలో వ్యాపారస్తులు తమ వద్ద ఉన్న నగదును వ్యాపార అవసరాలకు వాడుకోవచ్చు. ఇది వారిపై ఆర్థిక భారాన్ని తాత్కాలికంగా తగ్గిస్తుంది.

పరిశ్రమల విజ్ఞప్తి..
వివిధ పారిశ్రామిక సంఘాలు , ఎగుమతిదారులు ఇప్పటికే కేంద్ర ఆర్థిక శాఖకు తమ విన్నపాలను పంపారు. ప్రపంచవ్యాప్తంగా నెలకొన్న ఇంధన సంక్షోభం వల్ల దేశీయ పారిశ్రామిక ఉత్పత్తి తగ్గిపోతోందని, ఈ సమయంలో ప్రభుత్వ అండ అవసరమని వారు కోరుతున్నారు. ఆర్థిక మంత్రిత్వ శాఖ దీనిపై లోతైన అధ్యయనం చేస్తోంది. త్వరలోనే దీనిపై స్పష్టమైన మార్గదర్శకాలు విడుదలయ్యే అవకాశం ఉంది.

ఆర్థిక వ్యవస్థపై ప్రభావం..
ప్రభుత్వం ఈ నిర్ణయం తీసుకుంటే.. అది కేవలం వ్యాపారస్తులకే కాకుండా దేశ ఆర్థిక వృద్ధికి కూడా తోడ్పడుతుంది. వ్యాపారాలు మూతపడకుండా ఉంటేనే ఉపాధి అవకాశాలు మెరుగ్గా ఉంటాయి. అయితే.. బ్యాంకులపై దీని ప్రభావం ఎలా ఉంటుందనే కోణంలో కూడా ప్రభుత్వం చర్చిస్తోంది.