Giribabu Death : నాటి జ్ఞాపకాలు తలుచుకుని బాలయ్య భావోద్వేగం, దిగ్భ్రాంతి వ్యక్తం చేసిన చిరంజీవి!

తెలుగు వెండితెరపై విలనిజానికి, క్యారెక్టర్ ఆర్టిస్ట్ పాత్రలకు తనదైన శైలిలో ప్రాణం పోసిన సీనియర్ నటుడు గిరిబాబు మరణం టాలీవుడ్‌ను శోకసంద్రంలో ముంచెత్తింది. దశాబ్దాల పాటు చిత్ర పరిశ్రమతో విడదీయరాని బంధం ఉన్న ఆయన హఠాన్మరణం పట్ల సినీ ప్రముఖులు తీవ్ర దిగ్భ్రాంతి వ్యక్తం చేస్తున్నారు. ముఖ్యంగా టాలీవుడ్ ఇద్దరు అగ్ర కథానాయకులు మెగాస్టార్ చిరంజీవి, నటసింహం నందమూరి బాలకృష్ణ.. గిరిబాబుతో తమకున్న అనుబంధాన్ని గుర్తుచేసుకుంటూ వేసిన భావోద్వేగ పోస్టులు ఇప్పుడు అందరి హృదయాలను కదిలిస్తున్నాయి. గిరిబాబు మరణవార్త వినగానే నందమూరి బాలకృష్ణ తీవ్ర ఆవేదనకు గురయ్యారు. తన సినీ ప్రయాణం మొదలైన తొలినాళ్లలోనే గిరిబాబుతో కలిసి పనిచేసిన జ్ఞాపకాలను ఆయన గుర్తుచేసుకున్నారు. “నా కెరీర్ ప్రారంభంలోనే ‘అన్నదమ్ముల అనుబంధం’ చిత్రంలో ఆయనతో కలిసి నటించాను. ఆ తర్వాత నా ఎన్నో చిత్రాల్లో ఆయన అత్యంత కీలకమైన పాత్రలు పోషించారు” అంటూ బాలయ్య పాత జ్ఞాపకాలను నెమరువేసుకున్నారు.

గిరిబాబు కేవలం తెరపై కనిపించే గొప్ప నటుడు మాత్రమే కాదని, తెరవెనుక అంతకంటే గొప్ప మనసున్న వ్యక్తి అని బాలకృష్ణ కొనియాడారు. దర్శకుడిగా, నిర్మాతగా ఆయన చేసిన సేవలను గుర్తుచేసుకుంటూ.. గిరిబాబు తనయుడు రఘుబాబుకు, వారి కుటుంబ సభ్యులకు తన ప్రగాఢ సానుభూతిని తెలియజేశారు. మరోవైపు మెగాస్టార్ చిరంజీవి సైతం గిరిబాబు మృతి పట్ల తీవ్ర దిగ్భ్రాంతి వ్యక్తం చేస్తూ సోషల్ మీడియా వేదికగా నివాళులర్పించారు. “గిరిబాబు గారు ఇక లేరనే వార్త నన్ను ఎంతో కలిచివేసింది. తనదైన ప్రత్యేక శైలితో, విలక్షణమైన నటనతో ఎన్నో వైవిధ్యమైన పాత్రలను పోషించారు. నటుడిగానే కాకుండా నిర్మాతగా, దర్శకుడిగా తెలుగు సినిమాకు ఆయన అందించిన సేవలు ఎప్పటికీ చిరస్మరణీయం” అని చిరంజీవి పేర్కొన్నారు. ఆయన లేని లోటు తెలుగు చిత్ర పరిశ్రమకు ఎన్నటికీ తీర్చలేనిదని, ఆయన పవిత్ర ఆత్మకు శాంతి చేకూరాలని భగవంతుడిని ప్రార్థిస్తున్నట్లు మెగాస్టార్ తెలిపారు. ఒక తరం నటుడిగా ఇండస్ట్రీలో తనకంటూ ప్రత్యేక అధ్యాయాన్ని లిఖించుకున్న గిరిబాబు మరణంతో.. అటు మెగా, ఇటు నందమూరి క్యాంపులతో పాటు యావత్ తెలుగు సినీ లోకం కన్నీటి వీడ్కోలు పలుకుతోంది.