YS Jagan: డైవర్షన్ పాలిటిక్స్లో భాగంగానే జోగి రమేష్ అరెస్ట్

YS Jagan: వైసీపీ నేత, మాజీమంత్రి జోగి రమేష్ అరెస్ట్ పై మాజీ ముఖ్యమంత్రి వైఎస్ జగన్ తీవ్రంగా మండిపడ్డారు. డైవర్షన్ పాలిటిక్స్ లో భాగంగానే జోగి రమేష్ ను అరెస్ట్ చేశారంటూ ఎక్స్ లో ట్వీట్ చేశారు. చంద్రబాబు అండ్ కో నకిలీ మద్యం ఫ్యాక్టరీలు బయటపడటంతో అడ్డంగా దొరికిపోయారు.. దీని నుంచి తప్పించుకోవడానికి నిస్సిగ్గుగా కుట్రలకు పాల్పడుతూ మా పార్టీ మాజీ మంత్రి జోగి రమేష్‌ను అన్యాయంగా అరెస్టు చేశారు.. ముమ్మాటికీ ఇది అక్రమ అరెస్టు.. జోగి రమేష్‌ అరెస్టును తీవ్రంగా ఖండిస్తున్నాను.. గత 18 నెలలుగా ప్రభుత్వం మీది పాలన మీది.. పట్టుబడ్డ నకిలీ మద్యం మీ హయాంలోనిది.. పట్టుబడ్డ వారిలో మీ పార్టీ నుంచి ఎన్నికల్లో పోటీ చేసిన ఎమ్మెల్యే అభ్యర్థి మొదలు, మీతోనూ, మీ కొడుకుతోనూ, మీ మంత్రులతోనూ, మీ ఎమ్మెల్యేలతోనూ, అత్యంత సన్నిహిత సంబంధాలు ఉన్నవారే అని జగన్ మోహన్ రెడ్డి వెల్లడించారు.

Read Also: NBK 111 : బాలయ్య సరసన ‘యువరాణి’ని ప్రకటించేందుకు ముహూర్తం ఫిక్స్..

ఇక, మీరు తయారు చేసిన నకిలీ మద్యాన్ని అంతా అమ్మేది మీ కార్యకర్తలు, నాయకులు నడిపే బెల్టు షాపుల్లోనే, పర్మిట్‌ రూముల్లోనే అని వైఎస్ జగన్ పేర్కొన్నారు. తయారీ మీది, చేసిన వారు మీవారు, అమ్మేదీ మీరే, కాని బురద జల్లేది, అక్రమ అరెస్టులు చేసేది మాత్రం మావాళ్లనా అని ప్రశ్నించారు. నిన్న కాశీబుగ్గ ఆలయంలో తొక్కిసలాటకు కారణమైన ప్రభుత్వ వైఫల్యాల నుంచి దృష్టి మళ్లించడానికి, మొంథా తుఫాను కారణంగా కుదేలైన రైతు గోడును పక్కదోవ పట్టించడానికి ఈ అక్రమ అరెస్టుకు పాల్పడ్డారని విమర్శించారు. నకిలీ మద్యం వ్యవహారంపై సీబీఐ విచారణ జరిపించాలంటూ జోగి రమేష్‌ హైకోర్టులో పిటిషన్‌ వేసిన మరుసటిరోజే అరెస్టుకు దిగారంటే చంద్రబాబు ఎంతగా భయపడుతున్నారో అర్థం అవుతూందని మాజీ సీఎం జగన్ తెలిపారు.

Read Also: Lavanya-Varun Tej : యానివర్సరీ సెలబ్రేషన్స్ లో.. లావణ్య వరుణ్ స్పెషల్ పోస్ట్‌

అయితే, నకిలీ మద్యం వ్యవహారంలో మీ ప్రమేయం, మీ మనుషుల ప్రమేయం లేకపోతే సీబీఐ చేత విచారణకు చేయించడానికి భయమెందుకు చంద్రబాబు? అని వైఎస్ జగన్ ప్రశ్నించారు. ఎందుకు వెనకడుగు వేస్తున్నారు?.. మీ జేబులో ఉన్న సిట్‌ మీరు ఏం చెప్తే అది చేస్తుంది.. మీరు సిట్‌ అంటే సిట్‌.. స్టాండ్‌ అంటే స్టాండ్‌.. మీ మాఫియా వ్యవహారాల మీద మీరే విచారణ చేయించడం హాస్యాస్పదం కాదా? అని ఎద్దేవా చేశారు. ఇలాంటి రాక్షస పాలనలో మీ నుంచి ఏమి ఆశించగలం అని జగన్ మోహన్ రెడ్డి అన్నారు.