Pawan Kalyan Meets Mohan Yadav: పవన్ కళ్యాణ్‌తో మధ్యప్రదేశ్ సీఎం మోహన్ యాదవ్ భేటీ.. పులుల సంరక్షణపై కీలక చర్చలు

Pawan Kalyan Meets Mohan Yadav: ఆంధ్రప్రదేశ్ ఉప ముఖ్యమంత్రి, జనసేన పార్టీ అధినేత పవన్ కళ్యాణ్‌తో మధ్యప్రదేశ్ ముఖ్యమంత్రి మోహన్ యాదవ్ భేటీ అయ్యారు. జనసేన కేంద్ర కార్యాలయంలో జరిగిన ఈ సమావేశంలో పవన్ కళ్యాణ్.. మోహన్ యాదవ్‌కు సాదర స్వాగతం పలికారు. అనంతరం ఇరు రాష్ట్రాల అభివృద్ధికి సంబంధించిన పలు కీలక అంశాలపై ఇద్దరు నేతలు చర్చించారు.

ఈ సమావేశంలో ప్రధానంగా నాగార్జునసాగర్- శ్రీశైలం టైగర్ రిజర్వ్ (NSTR) పరిధిలో పులుల సంరక్షణ చర్యలను మరింత బలోపేతం చేసే అంశాన్ని పవన్ కళ్యాణ్ ప్రస్తావించారు. వన్యప్రాణుల సంరక్షణకు సంబంధించి చేపట్టాల్సిన చర్యలపై చర్చించినట్లు సమాచారం. అలాగే నాగార్జునసాగర్- శ్రీశైలం టైగర్ రిజర్వ్ పరిధిలో అడవి దున్నలను తిరిగి ప్రవేశపెట్టేందుకు సంబంధించిన ఒప్పందాన్ని త్వరితగతిన ముందుకు తీసుకెళ్లాలని పవన్ కళ్యాణ్ కోరారు. అటవీ పర్యావరణ వ్యవస్థను బలోపేతం చేయడంలో వన్యప్రాణుల సంరక్షణకు ప్రాధాన్యం ఉందనే అంశంపై ఈ చర్చలు జరిగినట్లు తెలుస్తోంది.

ఈ సందర్భంగా త్వరలో మధ్యప్రదేశ్‌లో పర్యటించనున్నట్లు పవన్ కళ్యాణ్ వెల్లడించారు. ఈ పర్యటన ద్వారా ఇరు రాష్ట్రాల మధ్య పరస్పర సహకారం, అభివృద్ధికి సంబంధించిన అంశాలపై మరింత చర్చించే అవకాశం ఉంది. సమావేశం సందర్భంగా మధ్యప్రదేశ్ ముఖ్యమంత్రి మోహన్ యాదవ్‌కు పవన్ కళ్యాణ్ ప్రత్యేక బహుమతులు అందజేశారు. సంప్రదాయానికి ప్రతీకగా ఉప్పాడ పట్టు శాలువా, ఆంధ్రప్రదేశ్ కళా వైభవాన్ని చాటిచెప్పే కొండపల్లి కళాకృతిని బహూకరించారు.