Firecracker Shop Fire: వ్యాపార ప్రచారం కోసం రీల్.. బాణసంచా దుకాణంలో మంటలు, యజమాని మృతి

Firecracker Shop Fire: వ్యాపారం పెంచాలనే ఉద్దేశంతో ఓ యజమాని చేసిన ప్రయత్నం అతడి ప్రాణాలు తీసింది… రీల్స్ చేయిస్తుండగా ప్రమాదవశాత్తు బాణసంచా షాపులో మంటలు చెలరేగి ప్రమాదం జరగడంతో యజమాని ప్రాణాలు కోల్పోగా.. వాచ్ మెన్ తీవ్రగాయాలపాలయ్యాడు. ఈ ఘటన పల్నాడు జిల్లా చిలకలూరిపేట మండలం బెల్ పూడికలో చోటు చేసుకుంది..

చిలకలూరిపేట పట్టణానికి చెందిన భూమా సురేష్ అద్దాల వ్యాపారంతో పాటు బొప్పూడి వద్ద కేఎస్ఎస్ పేరుతో బాణాసంచా హోల్ సేల్ దుకాణం నిర్వహిస్తున్నాడు. దీపావళి సీజన్ నేపథ్యంలో అక్కడే ఉంటూ వ్యాపారం చేస్తున్నాడు. శుక్రవారం తన కుమారుడిని దుకాణానికి తీసుకెళ్లాడు. దీపావళి ఆఫర్లపై రీల్ చేసి సోషల్ మీడియాలో ప్రచారం చేయాలని భావించాడు. దుకాణం ముందు కుమారుడితో టపాసులు కాల్పించాడు. ఇదే సమయంలో బాణసంచా దుకాణంలో పడటంతో ఒక్కసారిగా మంటలు చెలరేగాయి. దుకాణంలో ఉన్న టపాసులన్నీ పేలడంతో మంటలు ఎగిసిపడ్డాయి. షాపులోపల ఉన్న సురేష్ బయటకు రాలేక మంటల్లో చిక్కుకున్నాడు. కాలిపోతూ బయటకు వచ్చి పడిపోయాడు. ఈ ఘటనలో వాచ్ మెన్ మస్తాన్ రావుకు కూడా గాయాలయ్యాయి. తీవ్రంగా గాయపడిన సురేష్ ను చిలకలూరిపేట ప్రభుత్వ ఆసుపత్రికి తరలించగా చికిత్స పొందుతూ మృతి చెందాడు. సమాచారం అందుకున్న చిలకలూరిపేట ఫైర్ సిబ్బంది మంటలను అదుపు చేశారు. పోలీసులు, ఫైర్ సిబ్బంది ఘటనా స్థలాన్ని పరిశీలించారు. ఘటనపై హోం మంత్రి అనిత, డీజీపీ హరీష్ కుమార్ గుప్తా వివరాలు అడిగి తెలుసుకున్నారు. కేసు నమోదు చేసి దర్యాప్తు చేస్తున్నట్లు పోలీసులు తెలిపారు.