CM Chandrababu: వర్షాలపై సీఎం చంద్రబాబు టెలీకాన్ఫరెన్స్.. కలెక్టర్లకు కీలక ఆదేశాలు

CM Chandrababu: తీవ్ర వాయుగుండం ప్రభావంతో ఆంధ్రప్రదేశ్‌లోని పలు జిల్లాల్లో కురుస్తున్న భారీ వర్షాల పరిస్థితిపై ముఖ్యమంత్రి నారా చంద్రబాబు నాయుడు జిల్లా కలెక్టర్లతో టెలీకాన్ఫరెన్స్ నిర్వహించారు. వర్షాలు తగ్గుముఖం పట్టే వరకు వర్ష ప్రభావిత జిల్లాల కలెక్టర్లు అప్రమత్తంగా ఉండాలని, ఎక్కడా ప్రాణనష్టం జరగకుండా ముందస్తు చర్యలు చేపట్టాలని సీఎం ఆదేశించారు. రిజర్వాయర్లు, నదుల్లోకి వచ్చే నీటి ప్రవాహాన్ని ఎప్పటికప్పుడు అంచనా వేస్తూ, పరిస్థితులకు అనుగుణంగా క్షేత్రస్థాయి వరకు సూచనలు జారీ చేయాలని చంద్రబాబు సూచించారు. వాయుగుండం తీరం దాటినందున వర్షాలు మరింత ఎక్కువగా కురిసే అవకాశం ఉందని, ఈ రోజు, రేపు కూడా జిల్లా కలెక్టర్లు అప్రమత్తంగా ఉండాలని స్పష్టం చేశారు.

శ్రీకాకుళం జిల్లాలో కొంతమేర వరి పంట దెబ్బతిన్నట్లు అధికారులు సీఎంకు వివరించారు. ఎంత మేర పంట నష్టం జరిగిందో క్షేత్రస్థాయిలో అంచనా వేసి నివేదిక సిద్ధం చేయాలని చంద్రబాబు ఆదేశించారు. వర్ష ప్రభావం ఉన్న జిల్లాల్లో ఈ రోజు కూడా పాఠశాలలు, అంగన్‌వాడీ కేంద్రాలకు సెలవు ప్రకటించాలని సూచించారు. వర్ష ప్రభావిత ప్రాంతాల్లో ప్రజలకు తాగునీరు, ఆహారం, మందులు అందుబాటులో ఉండేలా చూడాలని, విద్యుత్ సరఫరాకు అంతరాయం కలగకుండా చర్యలు తీసుకోవాలని సీఎం ఆదేశించారు. జిల్లాల్లోకి వస్తున్న ఇన్‌ఫ్లోను ఎప్పటికప్పుడు అంచనా వేసుకుని జిల్లా యంత్రాంగం మొత్తం అప్రమత్తంగా ఉండాలని సూచించారు.

మరోవైపు సముద్రంలో వేటకు వెళ్లిన మత్స్యకారులను సురక్షితంగా తిరిగి రప్పించేందుకు చర్యలు చేపట్టినట్లు అధికారులు తెలిపారు. జిల్లాల వారీగా నమోదైన వర్షపాతం, ఇప్పటివరకు చేపట్టిన సహాయక చర్యలను సీఎం చంద్రబాబు కలెక్టర్లను అడిగి తెలుసుకున్నారు. ఈ టెలీకాన్ఫరెన్స్‌లో శ్రీకాకుళం, విజయనగరం, విశాఖపట్నం, మన్యం, ఏఎస్‌ఆర్, అనకాపల్లి, పశ్చిమ గోదావరి, తూర్పు గోదావరి, డాక్టర్ బీఆర్ అంబేద్కర్ కోనసీమ, ఏలూరు, పోలవరం, కృష్ణా జిల్లాల కలెక్టర్లు పాల్గొన్నారు. వాయుగుండం ఈ రాత్రి ఒంటిగంట సమయంలో పోలాకి వద్ద తీరం దాటే అవకాశం ఉందని విపత్తు నిర్వహణ అధికారులు ముఖ్యమంత్రి చంద్రబాబుకి వివరించారు.