Are Shyamala: 3 నెలల్లో గంజాయి లేకుండా చేస్తామన్నారు.. ఏమైంది..? ప్రభుత్వాన్ని నిలదీసిన ఆరె శ్యామల

Are Shyamala: ఆంధ్రప్రదేశ్‌ రాష్ట్రంలో గంజాయి, మాదక ద్రవ్యాల వ్యవహారంపై వైసీపీ రాష్ట్ర అధికార ప్రతినిధి ఆరె శ్యామల కూటమి ప్రభుత్వంపై తీవ్ర విమర్శలు చేశారు. ఏపీని కూటమి ప్రభుత్వం మత్తులో ముంచుతోందని ఆరోపించారు. ఎన్నికల ముందు అధికారంలోకి వస్తే గంజాయిని పూర్తిగా నిర్మూలిస్తామని చంద్రబాబు, లోకేష్ హామీ ఇచ్చారని, కానీ ప్రస్తుతం రాష్ట్రంలో గంజాయి విచ్చలవిడిగా లభిస్తోందని ఆమె విమర్శించారు. రాష్ట్రాన్ని గంజాయిరహితంగా మార్చేశామని ప్రభుత్వ పెద్దలు చెబుతున్నారని, అదే సమయంలో వేల సంఖ్యలో మాదక ద్రవ్యాల కేసులు నమోదు చేసి గంజాయి పట్టుకున్నామని పోలీసు అధికారులు చెబుతున్నారని శ్యామల ప్రశ్నించారు. ప్రభుత్వం చెబుతున్నదేంటి.. పోలీసుల లెక్కలు చెబుతున్నదేంటని నిలదీశారు. అద్దంకిలో గంజాయి తరలిస్తూ పోలీసులు పట్టుబడ్డారని, రాష్ట్రంలోని పలు ప్రాంతాల్లో నమోదవుతున్న డ్రగ్స్ కేసులు ఆందోళన కలిగిస్తున్నాయని పేర్కొన్నారు.

హోంమంత్రి వంగలపూడి అనితపై కూడా ఆరె శ్యామల విమర్శలు చేశారు. తన శాఖపై దృష్టి పెట్టడం కంటే టీవీ షోలకు టీఆర్పీలు పెంచుకోవడంపైనే ఆమెకు ఎక్కువ శ్రద్ధ ఉందని ఆరోపించారు. మాటలకే పరిమితమైన హోంమంత్రిగా అనిత మిగిలిపోయారని విమర్శించారు. అధికారంలోకి వచ్చిన మూడు నెలల్లో ఒక్క గంజాయి మొక్క కూడా కనిపించకుండా చేస్తామని గతంలో గొప్పలు చెప్పారని గుర్తుచేశారు. ఇక, డ్రగ్స్ కేసులో టీడీపీ ఎంపీనే పట్టుబడ్డారని శ్యామల ఆరోపించారు. యువత భవిష్యత్తుతో కూటమి ప్రభుత్వం ఆడుకుంటోందని విమర్శించారు. గత వైసీపీ ప్రభుత్వ హయాంలో స్పెషల్ ఎన్‌ఫోర్స్‌మెంట్ బ్యూరో (SEB) ఏర్పాటు చేసి గంజాయిపై చర్యలు తీసుకున్నామని తెలిపారు. వైసీపీ నేతలపై ఆరోపణలు చేయడం తప్ప గత రెండున్నరేళ్లలో కూటమి ప్రభుత్వం ఏం చేసిందని ప్రశ్నించారు. రాష్ట్రంలో డ్రగ్స్‌ను పూర్తిస్థాయిలో నిర్మూలించాల్సిన అవసరం ఉందని అన్నారు. యువతను మాదక ద్రవ్యాల బారినుంచి కాపాడేందుకు ప్రభుత్వం కఠిన చర్యలు తీసుకోవాలని డిమాండ్ చేశారు వైసీపీ రాష్ట్ర అధికార ప్రతినిధి ఆరె శ్యామల.