AP DSC 2026 Notification: టీచర్ ఉద్యోగార్థులకు గుడ్ న్యూస్.. DSC నోటిఫికేషన్ విడుదల

AP DSC 2026 Notification: ఆంధ్రప్రదేశ్‌లో ఉపాధ్యాయ ఉద్యోగాల కోసం ఎదురుచూస్తున్న అభ్యర్థులకు ప్రభుత్వం కీలక సమాచారం వెల్లడించింది. DSC-2026 ద్వారా రాష్ట్రవ్యాప్తంగా 2,721 టీచర్ పోస్టులను భర్తీ చేయనున్నారు. ఈ మేరకు అక్టోబర్ 13న ఉత్తర్వులు జారీ చేసి, బ్రీఫ్ నోటిఫికేషన్ విడుదల చేశారు. పూర్తి నోటిఫికేషన్‌ను నవంబర్ 3, 2026లోపు విడుదల చేయనున్నట్లు సమాచారం. ఈ నియామకాల్లో జనరల్ స్కూళ్లకు సంబంధించి 2,111 పోస్టులు, స్పెషల్ ఎడ్యుకేషన్ విభాగంలో 350 పోస్టులు, సొసైటీలు, ఇతర యాజమాన్యాల పరిధిలో 260 పోస్టులు ఉన్నాయి. పోస్టుల విభజనలో స్కూల్ అసిస్టెంట్ పోస్టులు 906, సెకండరీ గ్రేడ్ టీచర్ (SGT) పోస్టులు 1,205 ఉన్నాయి.

స్పెషల్ ఎడ్యుకేషన్ విభాగంలో 150 స్కూల్ అసిస్టెంట్ పోస్టులు, 200 SGT పోస్టులను భర్తీ చేయనున్నారు. వీటితోపాటు 30 ప్రిన్సిపాల్ పోస్టులు, 81 పోస్ట్ గ్రాడ్యుయేట్ టీచర్ (PGT) పోస్టులు, 113 ట్రైన్డ్ గ్రాడ్యుయేట్ టీచర్ (TGT) పోస్టులు, రెండు ఫిజికల్ డైరెక్టర్ పోస్టులు, 34 ఫిజికల్ ఎడ్యుకేషన్ టీచర్ (PET) పోస్టులు ఉన్నాయి. అభ్యర్థుల నుంచి ఆన్‌లైన్‌లోనే దరఖాస్తులు స్వీకరించనున్నారు. కంప్యూటర్ ఆధారిత పరీక్ష (CBT) ద్వారా అభ్యర్థులను ఎంపిక చేయనున్నారు. DSC-2026కు సంబంధించిన సిలబస్ ఇప్పటికే వెబ్‌సైట్‌లో అందుబాటులో ఉన్నట్లు సమాచారం. అభ్యర్థులు పరీక్షకు సిద్ధమయ్యేందుకు సిలబస్‌ను పరిశీలించవచ్చు. జిల్లాల వారీగా, సొసైటీల వారీగా ఖాళీల వివరాలను పూర్తి నోటిఫికేషన్‌లో వెల్లడించనున్నారు. తుది ఖాళీల సంఖ్య, అర్హతలు, దరఖాస్తుల గడువు, పరీక్షల షెడ్యూల్ వంటి పూర్తి వివరాలు అధికారిక నోటిఫికేషన్‌లో పేర్కొననున్నారు.