AP Liquor Shops: లిక్కర్ షాపులపై కీలక నిర్ణయం.. ఇక రెన్యువల్ గడువు పొడిగింపు లేదు..!

AP Liquor Shops: ఆంధ్రప్రదేశ్‌లో 2026–27 ఎక్సైజ్ సంవత్సరానికి ఏ4 మద్యం షాపుల లైసెన్సుల రెన్యువల్ ప్రక్రియకు గడువు ముగిసింది. ఇకపై గడువు పొడిగించకూడదని ఆంధ్రప్రదేశ్ ఎక్సైజ్ శాఖ నిర్ణయించింది. రెన్యువల్ ప్రక్రియలో భాగంగా ఇవాళ అర్ధరాత్రి వరకు చెల్లింపులు చేసేందుకు అవకాశం కల్పించారు. గడువులోగా రెన్యువల్ రిటైల్ ఎక్సైజ్ ట్యాక్స్ (RET) మొత్తాన్ని 100 శాతం చెల్లించిన షాపులను మాత్రమే రెన్యువల్‌కు పరిగణించనున్నారు.

3,650 షాపులు రెన్యువల్‌కు నోటిఫై
సెప్టెంబర్ 23 వరకు రాష్ట్రవ్యాప్తంగా మొత్తం 3,650 ఏ4 మద్యం షాపులను రెన్యువల్‌కు నోటిఫై చేశారు. వీటిలో 3,236 షాపులు రెన్యువల్‌కు ముందుకు వచ్చాయి. మొత్తం 2,906 షాపులకు సంబంధించి చెల్లింపులు నమోదయ్యాయి. ఇందులో 2,873 షాపులు రెన్యువల్ RET మొత్తాన్ని పూర్తిగా చెల్లించగా, మరో 33 షాపులు పాక్షికంగా చెల్లింపులు చేశాయి. అయితే, రాష్ట్రవ్యాప్తంగా నోటిఫై చేసిన మొత్తం షాపుల్లో 88.7 శాతం రెన్యువల్‌కు దరఖాస్తు చేసుకున్నాయి. దాదాపు 80 శాతం షాపులకు సంబంధించి చెల్లింపులు నమోదయ్యాయి. చెల్లింపుల శాతంలో తూర్పుగోదావరి జిల్లా 97.1 శాతంతో ముందంజలో ఉంది. అల్లూరి సీతారామరాజు జిల్లాలో 94.7 శాతం, శ్రీ సత్యసాయి జిల్లాలో 91.8 శాతం, కోనసీమ జిల్లాలో 91.1 శాతం, ఏలూరు జిల్లాలో 91 శాతం చెల్లింపులు నమోదయ్యాయి. మరోవైపు గుంటూరు జిల్లాలో 64.5 శాతం, బాపట్ల జిల్లాలో 68.8 శాతం, విశాఖపట్నం జిల్లాలో 69 శాతం చెల్లింపులు నమోదయ్యాయి. ఇవాళ అర్ధరాత్రి వరకు రెన్యువల్ RETలో 100 శాతం చెల్లింపులు పూర్తి చేసిన షాపులను రెన్యువల్‌కు పరిగణించనున్నారు.

మిగిలిన షాపులకు తాజా దరఖాస్తులు
రెన్యువల్ ప్రక్రియ పూర్తయిన తర్వాత మిగిలిపోయే ఏ4 మద్యం షాపులతో పాటు ఇప్పటివరకు నోటిఫై చేయని ఏ4 షాపులకు తాజా దరఖాస్తుల ద్వారా లైసెన్సులు కేటాయించనున్నారు. ఇందుకు సంబంధించిన గెజిట్ నోటిఫికేషన్‌ను రేపు విడుదల చేయనున్నట్లు ఎక్సైజ్ శాఖ వెల్లడించింది. మరోవైపు.. తాజా దరఖాస్తుల సమర్పణకు అక్టోబర్ 1 అర్ధరాత్రి వరకు గడువు ఉంటుంది. అక్టోబర్ 2న దరఖాస్తులను పరిశీలిస్తారు. అనంతరం అక్టోబర్ 3న లాటరీ నిర్వహించి ఏ4 మద్యం షాపులను కేటాయించనున్నారు. ఈ మేరకు రాష్ట్ర ఎక్సైజ్ శాఖ తదుపరి ప్రక్రియను కొనసాగించనుంది.