తెలంగాణ రాజకీయాలు వేడివాడిగా సాగుతున్నాయి. ఈటల నెక్స్ట్ ఎలాంటి అడుగు వేస్తారని సమస్త తెలంగాణ ప్రజల్లో ఓ ప్రశ్న మెదులుతోంది. మొన్నటి వరకు సొంత పార్టీకే ఓటు వేసిన.. ఈటల రాజేందర్ BJPలో చేరడానికే మొగ్గు చూపుతున్నారు. ఇందుకు గాను జూన్ 6 వ తేదీ ముహూర్తం ఖరారైనట్లు సమాచారం. ప్రధాని మోడీ,అమిత్ షా,నడ్డాల అపాయింట్ మెంట్ తేదీ కోసం ఈటల ఎదురు చూస్తున్నట్టు తెలిసింది. జూన్ 2 న ఎమ్మెల్యే పదవికి, టీఆర్ఎస్ పార్టీకి రాజీనామా చేయాలని ఈటల సూత్రప్రాయంగా నిర్ణయించుకున్నట్టు తెలుస్తోంది. దీంతో హుజూరాబాద్ లో ఉప ఎన్నిక అనివార్యం కానుంది. అయితే ఈ ఉపఎన్నికల్లో ఎవరినీ బరిలోకి దించాలనేది టీఆర్ఎస్ కు పెద్ద సవాలుగా మారనుంది. ఎందుకంటే హుజూరాబాద్ లో ఈటల స్థాయి నాయకులు ఎవరు లేరు. పక్క నియోజకవర్గంలో నుంచి ఓ నాయకున్ని తెచ్చుకోవాలి… లేదా ఇతర పార్టీల లీడర్ కు గాలం వేయాల్సిందే. అయితే గులాబీ బాస్.. ఇతర పార్టీ లీడర్ కే మొగ్గు చూపినట్లు తెలుస్తోంది. ఈటల బిజేపి లోకి చేరగానే.. మాజీ మంత్రి పెద్దిరెడ్డిని టీఆర్ఎస్ లోకి చేర్చుకోవాలని కెసిఆర్ ఆలోచిస్తున్నారట. ఈ వ్యూహంపై ఇప్పటికే ట్రబుల్ షూటర్ కు ఆదేశాలు వెళ్లాయని టాక్. అన్ని అనుకుంటే పెద్దిరెడ్డి గులాబీ తీర్థం పుచ్చుకోవడం ఖాయంగా కనిపిస్తోంది.
