ఒక వైపు ఒమిక్రాన్..మరో వైపు స్కూళ్ళలో కరోనా టెన్షన్

కరోనా మహమ్మారి ఇంకా మనల్ని వీడలేదు. కరోనా కంటే వేగంగా ఒమిక్రాన్ వ్యాప్తి చెందుతున్న సంగతి తెలిసిందే. ఒమిక్రాన్​ కేసుల సంఖ్య రోజూ పెరుగుతోంది. ఇప్పటి వరకు 17 రాష్ట్రాలు, కేంద్రపాలిత ప్రాంతాలకు కొత్త వేరియంట్​ విస్తరించినట్టు సమాచారం. రాజస్థాన్​లో 21, దిల్లీలో 12, కేరళలో 8 ఒమిక్రాన్​ కేసులు కొత్తగా బయటపడడంతో ఆందోళన వ్యక్తం అవుతోంది. తమిళనాడులో ఒమిక్రాన్​ ఒక్కసారిగా విజృంభించే ప్రమాదం ఉందని ప్రపంచ ఆరోగ్య సంస్థ హెచ్చరించడంతో అంతా అలర్ట్ అయ్యారు. మహారాష్ట్రలోని అహ్మద్​నగర్​లోని ఓ స్కూల్లో 19 మంది విద్యార్థులు కరోనా బారినపడడంతో అక్కడ పరీక్షలు ముమ్మరం చేశారు.

దేశంలో మొత్తం కేసుల సంఖ్య 436కు చేరింది. మహారాష్ట్రలో అత్యధికంగా 108 మంది ఒమిక్రాన్​కేసులున్నాయి. ఢిల్లీలో 79, గుజరాత్- 43, రాజస్థాన్-​ 43, తెలంగాణ- 38, కేరళ- 37, తమిళనాడు- 34, కర్ణాటక- 31 , ఏపీలో నాలుగు కేసులు వచ్చాయి. దేశంలో ఇప్పటివరకు 115 మంది ఒమిక్రాన్​ను జయించి బయటపడ్డారు. కర్ణాటక, కోలార్​లోని వైద్య కళాశాలలో కొవిడ్​-19 కలవరం కలిగిస్తోంది.

33 మంది వైద్య విద్యార్థులకు కరోనా పాజిటివ్​గా తేలడంతో తల్లిదండ్రులు, అధ్యాపకులు ఆందోళనకు గురవుతున్నారు. దక్షిణాదిన ముఖ్యంగా తమిళనాడులో ఒమిక్రాన్ తీవ్రత ఎక్కువగా ఉండే అవకాశం ఉందని వైద్యనిపుణులు హెచ్చరిస్తున్నారు. పండగల సీజన్​లో జాగ్రత్తలు పాటించకపోవటం, అవసరమైన స్థాయిలో వ్యాక్సిన్లు లేకపవటం అందుకు కారణం కావచ్చంటున్నారు. దేశంలో ఒమిక్రాన్‌ బారినపడిన వారిలో అధిక శాతం మందిలో ఎలాంటి లక్షణాలూ కనబడడం లేదు. ఒకవేళ కొంతమందిలో కనిపించినా ఈ వేరియంట్‌ ప్రభావం స్వల్పంగానే ఉందని ఢిల్లీకి చెందిన పలువురు వైద్యరంగ నిపుణులు అంటున్నారు. దక్షిణాఫ్రికాలో ఒమిక్రాన్ బయటపడినా… అక్కడ ఈ వేరియంట్ సోకిన వారు త్వరగా కోలుకుంటున్నారు.