తొలి టీ20లో టీమిండియా ఘనవిజయం

రోహిత్-ద్రవిడ్ శకం విజయంతో ప్రారంభమైంది. జైపూర్ వేదికగా బుధవారం న్యూజిలాండ్‌తో జరిగిన తొలి టీ20లో టీమిండియా 5 వికెట్ల తేడాతో ఘనవిజయం సాధించింది. 165 పరుగుల లక్ష్య ఛేదనను రోహిత్, రాహుల్ జోడీ దూకుడుగా ప్రారంభించింది. 50 పరుగుల భాగస్వామ్యం అందించిన తర్వాత రాహుల్ (15) వెనుతిరిగినా… సూర్యకుమార్ యాదవ్ (62) సిక్సులు, ఫోర్లతో ఎడాపెడా బాదేశాడు. కెప్టెన్ రోహిత్ (48) దగ్గర ఔట్ అయ్యాడు. అనంతరం శ్రేయాస్ అయ్యర్ (5), వెంకటేష్ అయ్యర్ (4) విఫలమైనా పంత్ (17 నాటౌట్), అక్షర్ పటేట్ (1 నాటౌట్) లాంఛనాన్ని పూర్తి చేశారు. కివీస్ బౌలర్లలో బౌల్ట్ 2 వికెట్లు తీయగా సౌథీ, శాంట్నర్, మిచెల్ తలో వికెట్ సాధించారు.

అంతకుముందు టాస్ ఓడి తొలుత బ్యాటింగ్ చేసిన న్యూజిలాండ్ జట్టుకు గప్తిల్ (70), చాప్‌మన్ (63) దూకుడుగా బ్యాటింగ్ చేసి 164 పరుగుల స్కోరును అందించారు. చివరి ఓవర్లలో భారత బౌలర్లు న్యూజిలాండ్ బ్యాట్స్‌మెన్‌ను కట్టడి చేశారు. భారత బౌలర్లలో భువనేశ్వర్ 2, అశ్విన్ 2 వికెట్లు తీయగా… సిరాజ్, చాహర్ చెరో వికెట్ తీశారు.