ఎన్టీయార్, చెర్రీ ఫ్యాన్స్ కడుపు నింపేసిన రాజమౌళి!

‘బాహుబలి’ వంటి మేగ్నమ్ ఓపస్ మూవీ తర్వాత రాజమౌళి తెరకెక్కిస్తున్న రియల్ మల్టీస్టారర్ మూవీ ‘ట్రిపుల్ ఆర్’. ఈ సినిమాకు సంబంధించి ఏ చిన్న అప్ డేట్ అఫీషియల్ గా వచ్చినా చాలు ఎన్టీయార్, రామ్ చరణ్ ఫ్యాన్స్ కు ఆ రోజు పండగే! ఇవాళ అదే జరిగింది. సినిమా అప్ డేట్స్ తో సరిపెట్టకుండా రాజమౌళి ఈ మూవీకి సంబంధించిన సూపర్ డూపర్ క్రేజీ పోస్టర్ నూ విడుదల చేశారు. యంగ్ టైగర్ ఎన్టీయర్ కొమరం భీమ్ గా బైక్ నడుపుతుంటే… ఆ వెనకే చిరునవ్వులు రువ్వుతూ కూర్చున్నాడు అల్లూరి సీతారామరాజు ఉరఫ్ రామ్ చరణ్. కేవలం రెండు పాటల మినహా సినిమా షూటింగ్ మొత్తం పూర్తయిపోయిందని, ఎన్టీయార్, చెర్రీ రెండు భాషలలో డబ్బింగ్ కూడా పూర్తి చేశారని ప్రకటించారు. మిగిలిన కార్యక్రమాలూ శరవేగంగా సాగుతాయనే హామీని ఇచ్చింది చిత్ర యూనిట్.

ఇదంతా బాగానే ఉంది కానీ పనిలో పనిగా మూవీ రిలీజ్ డేట్ కూడా ప్రకటిస్తే బాగుండేదని చాలామంది అభిప్రాయపడ్డారు. మిగిలింది రెండు పాటలు, కొంత పోస్ట్ ప్రొడక్షన్ వర్కే కాబట్టి…. ముందు అనుకున్నట్టు అక్టోబర్ 13న ఈ సినిమాను విడుదల చేసే ఆస్కారం లేకపోలేదనిపిస్తోంది. అయితే… రాజమౌళి వర్కింగ్ స్టైల్ తెలిసిన వారు మాత్రం… ఇంత ప్రతిష్టాత్మకమైన ప్రాజెక్ట్ ను హడావుడిగా పూర్తి చేసి, జనం ముందు పెట్టడానికి ఆయన అంగీకరించరని అంటున్నారు.
సో… ఫ్యాన్స్ అంతా ‘ట్రిపుల్ ఆర్’ పోస్టర్ ట్రెండింగ్ న్యూస్ ను ఆస్వాదిస్తూ, రిలీజ్ డేట్ ప్రకటన కోసం వేచి ఉండాల్సిందే!