టమోటా పేరు చెబితేనే జనాలు వణికిపోతున్నారు.. వద్దు బాబోయ్ అంటున్నారు సామాన్యులు.. ధరలు తగ్గుతాయాన్న ఆశ లేకుండా పోయింది.. ఎక్కడ చూసిన ఇదే టాపిక్ నడుస్తుంది.. టమోటా ధరలు డబుల్ సెంచరీ దాటుతున్నాయి. బంగారం రేటుతో పోటి పడుతూ దారుణంగా పెరుగుతున్నాయి.. సామాన్యులు అస్సలు కూరగాయలు కొనలేని పరిస్థితి నెలకొంది.. టమాటా రేట్లు సరికొత్త రికార్డ్ సృష్టించాయి. ప్రస్తుతం కిలో టమాటా ధర సెంచరీ దాటేసి దూసుకుపోతుంది. దాంతో ఈ కూరగాయ పేరు వింటే చాలు జనాలు బెంబేలెత్తిపోతున్నారు.
ఇక టమాటా ఎఫెక్ట్ మామూలుగా లేదు. హోటళ్ల నిర్వాహాకులకు నిద్ర లేకుండా చేస్తోంది. టమాట దెబ్బకు తమ హోటళ్లలో కొత్త రకం బోర్డులు పెట్టాల్సి వచ్చింది. ఉప్పు లేని పప్పు టమాటా లేని కర్రీ రుచిగా ఉండదు. శాకాహారం నుంచి మాంసాహారం వరకు అన్ని కూరల్లో టమాటా పడాల్సిందే. కానీ ఇది కొన్ని రోజుల క్రితం. ఇప్పుడా పరిస్థితి లేదు. టమాటా రేట్లు ఠారెత్తిస్తున్నాయి. కిలో ధర రూ.120 నుంచి 160 రూపాయలకు చేరింది. కొన్ని చోట్ల మరీ దారుణం రూ.200 దాటింది.. దాంతో ఇళ్లతో పాటు హోటళ్లు, రెస్టారెంట్లలో వినియోగం భారీగా తగ్గించేశారు. ఇదే ఇప్పుడు పెద్ద సమస్యగా మారింది..
ఒకప్పుడు కర్రీల్లోనే కాదు రసం, సాంబార్ లోనూ టమాటాను వాడటం లేదు. దాంతో హోటల్స్ లో టిఫిన్, భోజనం చేసే వారు గతంలోని రుచులను పోల్చుకుని టమాటా వేయలేదా అని నిర్వాహాకులను నిలదీస్తున్నారు. కొన్ని చోట్ల కస్టమర్లు, హోటళ్ల నిర్వాహాకుల మధ్య గొడవలు, ఘర్షణలు కూడా జరుగుతున్నాయి. దాంతో కస్టమర్లతో ఎందుకొచ్చిన తంటా అని.. హోటళ్లు, నిర్వాహాకులు జాగ్రత్త పడుతున్నారు. టమాటా కర్రీ అడగొద్దని ఏకంగా బోర్డులే పెట్టేస్తున్నారు.. కస్టమర్ దేవుళ్లకు ముఖ్య గమనిక.. ఇక్కడ టమాటా కర్రీ అందుబాటులో లేదు.. దయచేసి అడగరాదు అంటూ బోర్డులు రాసి హోటల్స్ ముందు పెడుతున్నారు..హైవేస్, స్టేట్ హైవేస్ పై డాబాలు, రెస్టారెంట్లు ఎక్కువ. ప్రయాణికులు, వాహనాల డ్రైవర్లు వీటిలోనే ఎక్కువగా తింటుంటారు. టమాటా ధర కిలో రూ.20 నుంచి రూ.50 ఉన్నప్పుడు రోజుకు 15 నుంచి 20 కిలోల టమాటా వాడిన నిర్వాహాకులు ఇప్పుడు 2 నుంచి 3 కిలోలతోనే సరిపెడ్తున్నారు. దాంతో సాంబారు, రసం, కర్రీలు రుచిగా ఉండటం లేదని కస్టమర్లు గగ్గోలు పెడుతున్నారు. వారికి సమాధానం చెప్పలేక నిర్వాహాకులు సతమతం అవుతున్నారు.. రేట్లు పెంచితే కస్టమర్లు హోటల్స్ వైపు చూడరు.. పెంచక పోతే మాకు నష్టాలు వస్తాయని వాపోతున్నారు.. మరి ఈ ధరలు ఎప్పటికి తగ్గుతాయో చూడాలి..
