ఢిల్లీ లిక్కర్ స్కామ్ కేసులో ఎమ్మెల్సీ కవితను ఈడీ అధికారులు ప్రశ్నిస్తున్నారు. అయితే, కవితను ఉద్దేశించి బీజేపీ రాష్ట్ర అధ్యక్షుడు బండి సంజయ్ చేసిన వ్యాఖ్యలపై బీఆర్ఎస్ నేతలు భగ్గుమన్నారు. ఢిల్లీలో బీఆర్ఎస్ నేతలు ఆందోళనలు చేస్తున్నారు. ఆ పార్టీకి చెందిన నేతలు, కార్యకర్తలు ఢిల్లీ తెలంగాణ భవన్ దగ్గర ఆందోళనలు చేస్తున్నారు. కవితను ఉద్దేశించి చేసిన వ్యాఖ్యల్ని నిరసిస్తూ… ఆందోళనలు చేశారు. ఆయన దిష్టిబొమ్మను తగలబెట్టేందుకు ప్రయత్నించడంతో ఉద్రిక్త పరిస్థితి ఏర్పడింది.
కాగా, ఇటీవల కేసీఆర్ కుటుంబం నుంచి ఒక వికెట్ పడుతుందంటూ బండి సంజయ్ వివాదాస్పద వ్యాఖ్యలు చేశారు. తప్పు చేసిన వారికి శిక్ష పడాల్సిందే అని బండి సంజయ్ అన్నారు. చట్ట సభల్లో మహిళా బిల్లుపై దీక్ష చేసే అర్హత కవితకు లేదన్నారు. కవిత మొదట ప్రగతి భవన్ ముందు ధర్నా చేయాలన్నారు.మహిళలకు జరుగుతున్న అన్యాయంపై ఎందుకు స్పందించడం లేదని కేసీఆర్ ను ప్రశ్నిస్తే బాగుండేదని విమర్శించారు. ఈ నేపథ్యంలోనే ఢిల్లీలో బీఆర్ఎస్ నేతలు బండి సంజయ్ పై ఆగ్రహం వ్యక్తం చేశారు. అయితే, బీఆర్ఎస్ చర్యలపై రాష్ట్ర బీజేపీ నేతలు తీవ్రంగా స్పందించారు. కావాలనే కుట్రపూరితంగా ఆందోళనలు చేస్తున్నారని బీజేపీ విమర్శించారు.
మరోవైపు కవితకు మద్దతుగా బీజేపీకి వ్యతిరేకంగా పోస్టర్లు, ఫ్లెక్సీలు వెలిశాయి. వాటిపై బై బై మోదీ అని రాశారు. ఆరోపణలు ఎదుర్కొనే వారు బీజేపీలో చేరగానే… ఆరోపణలన్నీ పోతాయని ఆ పోస్టర్లలో సెటైర్లు వేశారు.
