తెలంగాణ ప్రజలకు పౌర సేవలు, సంక్షేమ పథకాలను మరింత వేగంగా, పారదర్శకంగా అందించేందుకు రాష్ట్ర ప్రభుత్వం త్వరలోనే ప్రత్యేక ‘కుటుంబ రిజిస్టర్’ వ్యవస్థను అందుబాటులోకి తీసుకురానుంది. ప్రతి కుటుంబానికి సంబంధించిన వివరాలను ఒకే అధికారిక డిజిటల్ రికార్డు రూపంలో భద్రపరచడం ద్వారా సేవలు పొందడం సులభతరం కానుంది. ఈ విధానంలో భాగంగా ‘కుటుంబ రిజిస్టర్ సర్టిఫికెట్’ను జారీ చేస్తారు. ప్రజలు నేరుగా మీ సేవ కేంద్రాలను సందర్శించి లేదా మీ సేవ ఆన్లైన్ పోర్టల్, మొబైల్ యాప్ల ద్వారా ఈ సర్టిఫికెట్ కోసం సులభంగా దరఖాస్తు చేసుకోవచ్చని అధికారులు తెలిపారు.