హైదరాబాద్లోని శంషాబాద్ రాజీవ్ గాంధీ అంతర్జాతీయ విమానాశ్రయంలో పనిచేస్తున్న ఇండిగో ఎయిర్లైన్స్ ఉద్యోగినిపై ఒక క్యాబ్ డ్రైవర్ అత్యాచారయత్నానికి పాల్పడటం తీవ్ర కలకలం రేపింది. బాధితురాలు ప్రతిరోజు విధులకు వెళ్లేందుకు ఉపయోగించే క్యాబ్ డ్రైవరే ఈ దారుణానికి ఒడిగట్టాడు. విధులకు వెళ్తున్న క్రమంలో ఎయిర్పోర్ట్ ప్రాంగణంలోని ఒక నిర్మానుష్య ప్రాంతానికి క్యాబ్ను మళ్లించి ఆమెపై అఘాయిత్యానికి ప్రయత్నించాడు. సమయస్ఫూర్తితో స్పందించిన ఉద్యోగిని డ్రైవర్ను తీవ్రంగా ప్రతిఘటించడంతో, పట్టుబడతాననే భయంతో నిందితుడు అక్కడి నుంచి వాహనంతో సహా పరారయ్యాడు.
ఈ ఘటనపై బాధితురాలు వెంటనే శంషాబాద్ ఎయిర్పోర్ట్ అవుట్పోస్ట్ పోలీసులకు ఫిర్యాదు చేసింది. సమాచారం అందుకున్న పోలీసులు కేసు నమోదు చేసి, సీసీటీవీ దృశ్యాల ఆధారంగా నిందితుడి కోసం గాలింపు చర్యలు చేపట్టారు. విమానాశ్రయ ప్రాంగణంలోనే ఎయిర్లైన్స్ సిబ్బందికి ఇలాంటి ఘటన ఎదురవడంపై ఎయిర్పోర్ట్ అధికారులు అత్యంత సీరియస్గా స్పందించారు. ఈ ఘటన నేపథ్యంలో విమానాశ్రయంలో పనిచేసే సిబ్బంది, ముఖ్యంగా మహిళా ఉద్యోగుల రవాణా భద్రతా ప్రమాణాలపై అధికారులు అత్యవసర సమీక్ష నిర్వహించి, భద్రతను మరింత కట్టుదిట్టం చేసేందుకు చర్యలు ప్రారంభించారు.