Traffic Restrictions : రాజ్‌భవన్‌ ‘ఎట్ హోమ్’.. ఈ రూట్లలో ట్రాఫిక్ ఆంక్షలు..

Traffic Restrictions : భారత స్వాతంత్య్ర దినోత్సవాన్ని పురస్కరించుకుని ఆగస్టు 15న సాయంత్రం 6.00 గంటలకు రాజ్ భవన్ (లోక్ భవన్) లో తెలంగాణ గవర్నర్ సంప్రదాయ ‘ఎట్ హోమ్’ (At Home) కార్యక్రమాన్ని నిర్వహించనున్నారు. ఈ వేడుకకు విఐపిలు, సీనియర్ ప్రభుత్వ అధికారులు, హైకోర్టు న్యాయమూర్తులు , ఇతర ప్రముఖులు పెద్ద సంఖ్యలో హాజరుకానున్నారు. ఈ నేపథ్యంలో రాజ్ భవన్ రోడ్డులో సాయంత్రం 6.00 గంటల నుండి రాత్రి 8.00 గంటల వరకు తీవ్ర వాహన రద్దీ ఉండే అవకాశం ఉన్నందున, హైదరాబాద్ ట్రాఫిక్ జాయింట్ కమిషనర్ ఆఫ్ పోలీస్ డీ. జోయల్ డేవిస్, ఐపీఎస్ పలు ట్రాఫిక్ ఆంక్షలు, మళ్లింపులు , పార్కింగ్ ఏర్పాట్లను ప్రకటించారు.

ట్రాఫిక్ రద్దీ ప్రాంతాలు , ప్రత్యామ్నాయ మార్గాలు

ఈ వేడుకల కారణంగా మొనప్ప ఐలాండ్ నుండి ఖైరతాబాద్ వి.వి. విగ్రహం జంక్షన్ వరకు ఉన్న రాజ్ భవన్ రోడ్డుకు రెండు వైపులా వాహనాల రద్దీ అత్యధికంగా ఉంటుంది. సాధారణ ప్రజలు , ప్రయాణికులు సాయంత్రం 6:00 నుండి రాత్రి 8:00 గంటల మధ్య ఎలాంటి అసౌకర్యానికి గురికాకుండా ఉండటానికి ఈ మార్గాన్ని కాకుండా ఇతర ప్రత్యామ్నాయ దారులను ఎంచుకోవాలని పోలీసులు స్పష్టం చేశారు.

ఆహ్వానితులకు పార్కింగ్ నిబంధనలు , సహాయక మార్గాలు

కార్యక్రమానికి విచ్చేసే బ్రౌన్ కలర్ పాస్ కలిగిన వాహనాలు రాజ్ భవన్ గేట్ నెంబర్-1 ద్వారా లోపలికి ప్రవేశించి తమకు కేటాయించిన స్థలాల్లో పార్క్ చేయాల్సి ఉంటుంది, అలాగే వేడుక ముగిశాక గేట్ నెంబర్-2 ద్వారా నిష్క్రమించాలి. బ్లూ కలర్ పాస్ వాహనదారులు గేట్ నెంబర్-3 ద్వారా ప్రవేశించి, రాజ్ భవన్ క్వార్టర్స్ బై-లేన్, సంస్కృతి కమ్యూనిటీ హాల్, రాజ్ భవన్ స్కూల్, గవర్నమెంట్ నర్సింగ్ కాలేజ్, పోస్ట్ ఆఫీస్ బిల్డింగ్, మెట్రో రెసిడెన్సీ నుండి నాసర్ (NASR) స్కూల్ వరకు ఉన్న సింగిల్-లేన్, ఎంఎంటిఎస్ పార్కింగ్ స్థలం , స్కై సిటీ బిల్డింగ్ ప్రాంతాల్లో వాహనాలను నిలిపి, గవర్నర్స్ సెక్రటరీ (G.S) గేట్ ద్వారా బయటకు వెళ్లాల్సి ఉంటుంది.

ఈ ట్రాఫిక్ మళ్లింపులను గమనించి పోలీసులకు సహకరించాలని జాయింట్ కమిషనర్ కోరారు. లైవ్ ట్రాఫిక్ అప్‌డేట్ల కోసం హైదరాబాద్ ట్రాఫిక్ పోలీస్ సోషల్ మీడియా ఖాతాలను (ఫేస్‌బుక్: facebook.com/HYDTP లేదా ఎక్స్: @HYDP) చూడవచ్చని, అత్యవసర ప్రయాణ సహాయం కోసం ట్రాఫిక్ హెల్ప్‌లైన్ నంబర్ 9010203626ను సంప్రదించవచ్చని తెలిపారు.