Karimnagar Collectorate : కలెక్టరేట్‌లో బిగ్ షాక్.. తృటిలో తప్పిన ప్రమాదం.!

కరీంనగర్ జిల్లా కలెక్టరేట్ ప్రాంగణంలోని ప్రజావాణి ఆడిటోరియంలో సోమవారం ఉదయం ఒక పెద్ద ప్రమాదం త్రుటిలో తప్పిపోయింది. ప్రజా సమస్యల పరిష్కారం కోసం వారాంతపు ‘ప్రజావాణి’ కార్యక్రమం యథావిధిగా కొనసాగుతున్న సమయంలో, ఆడిటోరియం పైకప్పుకు ఉన్న ఒక పీఓపీ (POP) సీలింగ్ షీట్ ఒక్కసారిగా ఊడిపోయి కిందపడింది. అయితే, ఆ షీట్ పడిన సమయంలో కింద ఉన్న కుర్చీలో ఎవరూ కూర్చోకపోవడంతో అధికారులు, అర్జిదారులు తీవ్ర ఉపశమనం పొందారు. ఒకవేళ ఆ సమయానికి అక్కడ ఎవరైనా ఉండి ఉంటే తీవ్ర గాయాలయ్యేవని ప్రత్యక్ష సాక్షులు తెలిపారు.

ప్రమాదకరంగా మరో 20 షీట్లు.. వికలాంగుల కౌంటర్ వద్దే ముప్పు

ఈ సంఘటనతో కలెక్టరేట్ ఆడిటోరియం భద్రతపై తీవ్ర అనుమానాలు వ్యక్తమవుతున్నాయి. ప్రస్తుతం ఆడిటోరియంలో దాదాపు 15 నుంచి 20 పీఓపీ సీలింగ్ షీట్లు అత్యంత ప్రమాదకరంగా వేలాడుతున్నట్లు అధికారులు, ప్రజలు గుర్తించారు. అవి ఏ క్షణంలోనైనా ఊడిపడే అవకాశం ఉండటంతో ఆడిటోరియంలోకి వచ్చే ప్రతి ఒక్కరిలోనూ తీవ్ర ఆందోళన వ్యక్తమవుతోంది. ముఖ్యంగా దివ్యాంగుల కోసం ఏర్పాటు చేసిన ప్రత్యేక స్థానం వద్ద, స్వయంగా జిల్లా కలెక్టర్ దరఖాస్తులను స్వీకరించే ప్రదేశానికి సరిగ్గా పైననే ఒక పీఓపీ షీట్ ఊడిపోవడానికి సిద్ధంగా ఉండటం అక్కడి పరిస్థితి తీవ్రతకు అద్దం పడుతోంది.

యుద్ధప్రాతిపదికన మరమ్మతులు చేపట్టాలని డిమాండ్

ప్రతి సోమవారం జరిగే ప్రజావాణికి జిల్లా నలుమూలల నుంచి వందలాది మంది ప్రజలు, వివిధ శాఖల ఉన్నతాధికారులు పెద్ద సంఖ్యలో హాజరవుతుంటారు. ఈ నేపథ్యంలో భయాందోళనల నడుమ కార్యక్రమాలు నిర్వహించడం సరైంది కాదని ప్రజలు ఆవేదన వ్యక్తం చేస్తున్నారు. ఇప్పటికైనా జిల్లా యంత్రాంగం స్పందించి, ప్రమాదకరంగా ఉన్న పీఓపీ సీలింగ్ షీట్లను తక్షణమే తొలగించి, ఆడిటోరియంలో అవసరమైన మరమ్మతు పనులను యుద్ధప్రాతిపదికన చేపట్టాలని కలెక్టరేట్‌కు వచ్చిన అర్జిదారులు, అధికారులు విజ్ఞప్తి చేస్తున్నారు.