రాజకీయ నాయకురాలు ఇందిరా శోభన్ శనివారం ఆమ్ ఆద్మీ పార్టీలో చేరారు. ఈ సందర్భంగా ఆమె మాట్లాడుతూ.. ఆమ్ ఆద్మీ పార్టీ ఒక సామాన్యుల పార్టీ అని.. అందుకే తాను ఆ పార్టీలో చేరానన్నారు. ఆమ్ ఆద్మీ పార్టీలో చేరడం సంతోషంగా ఉందన్నారు. తెలంగాణ వచ్చిన తర్వాత రాజకీయాలు పూర్తిగా మారిపోయాయన్నారు. ఒక సాధారణ కుటుంబం నుంచి రాజకీయాల్లోకి వచ్చానని… బీజేపీ, టీఆర్ఎస్ ఒకే గొడుగు కింద పని చేస్తున్నాయని తెలిపారు. కేంద్రంలో బడా మోదీ, రాష్ట్రంలో చోట మోదీ కేసీఆర్ అంటూ ఇందిరా శోభన్ సెటైర్లు వేశారు. బీజేపీ, టీఆర్ఎస్ రెండూ ఒకటేనన్నారు.
తెలంగాణ ప్రజలను కేసీఆర్ పట్టించుకోవడం లేదని, నాలుగు వేల స్కూల్స్ మూసివేశారన్నారు. మోడీని, బీజేపీని ఎదుర్కొనే ఏకైక పార్టీ ఆమ్ ఆద్మీ పార్టీ అధ్యక్షుడు కేజ్రీవాల్ మాత్రమేనని ఇందిరా శోభన్ పేర్కొన్నారు. రాష్ట్రంలో కాంగ్రెస్ పార్టీ పని అయిపోయిందన్నారు. భవిష్యత్తులో చాలా మంది నేతలు ఆమ్ ఆద్మీ పార్టీలో చేరుతారని ఆశాభావం వ్యక్తం చేశారు. షర్మిల పార్టీ తెలంగాణలో సరియైన ప్రభావాన్ని చూపించడం లేదన్నారు. ఆ పార్టీని తెలంగాణలో ఎవ్వరూ నమ్మడం లేదని ఇందిరా శోభన్ పేర్కొన్నారు.
