సిద్దిపేట : 70 ఏళ్ళలో చేయని పనిని 7 ఏళ్ళలో పూర్తి చేశామని మంత్రి హరీష్ రావు అన్నారు. ఇవాళ గజ్వేల్ లో రేషన్ కార్డులు, కల్యాణలక్ష్మి, షాది ముబారక్ చెక్కుల పంపిణీ కార్యక్రమంలోఆయన పాల్గొన్నారు. ఈ సందర్భంగా మంత్రి హరీశ్ రావు మాట్లాడుతూ… అంతిమంగా గెలిచేది పనితీరే, మంచి తనమేనని… ఓట్ల కోసం కాకుండా ప్రజల సంక్షేమం కోసమే పని చేశామని తెలిపారు. తెలంగాణలో కొత్తగా 3 లక్షల 9 వేల 83 మందికి రేషన్ కార్డులు అందజేస్తున్నామని స్పష్టం చేశారు.
ప్రస్తుతం కొత్త కార్డులతో కలిపి రాష్ట్రంలో అన్ని రకాల కార్డులు దాదాపు 90.50 లక్షలకు చేరగా.. లబ్దిదారులు 2 కోట్ల 88 లక్షల మందికి చేరుకున్నారని తెలిపారు. దేశంలో 90.5 శాతం జనాభాకు రేషన్ బియ్యం అందిస్తున్న ఏకైక రాష్ట్రం తెలంగాణనేనన్నారు. రేషన్ పై ప్రతి ఏటా ప్రభుత్వం 2766 కోట్లు, ప్రతి నెలా 232 కోట్లు ఖర్చు చేస్తుందని తెలిపారు. రాజకీయ పార్టీలకు అతీతంగా సంక్షేమ పథకాలను అమలు చేస్తున్నామని వెల్లడించారు.
