Samsung Galaxy Sliding Phone: ఫోల్డబుల్ కాదు.. స్లైడింగ్ డిస్‌ప్లేతో సామ్ సంగ్ కొత్త ఫోన్! డిజైన్ లీక్

Samsung Galaxy Sliding Phone: స్మార్ట్‌ఫోన్ మార్కెట్‌లో ఎప్పటికప్పుడు సరికొత్త టెక్నాలజీని పరిచయం చేసే ప్రముఖ ఎలక్ట్రానిక్స్ సంస్థ సామ్ సంగ్ (Samsung) మరో వినూత్న ప్రయోగానికి సిద్ధమవుతోంది. ఇప్పటికే ఫోల్డబుల్ స్మార్ట్‌ఫోన్ల విభాగంలో తనకంటూ ప్రత్యేక గుర్తింపు తెచ్చుకున్న ఈ దక్షిణ కొరియా కంపెనీ.. ఇప్పుడు స్లైడింగ్ డిస్‌ప్లే టెక్నాలజీతో కొత్త గెలాక్సీ స్మార్ట్‌ఫోన్‌ను అభివృద్ధి చేస్తున్నట్లు సమాచారం. తాజాగా ఈ ఫోన్‌కు సంబంధించిన డిజైన్ ఫొటోలు లీక్ కావడంతో టెక్నాలజీ ప్రపంచంలో ఆసక్తి నెలకొంది.

స్లైడింగ్ డిస్‌ప్లేతో సామ్ సంగ్ కొత్త ప్రయోగం

సామ్ సంగ్ అభివృద్ధి చేస్తున్నట్లు ప్రచారం జరుగుతున్న ఈ స్లైడింగ్ డిస్‌ప్లే స్మార్ట్‌ఫోన్‌కు సంబంధించిన చిత్రాలను ప్రముఖ టిప్‌స్టర్ ఐస్ యూనివర్స్ (Ice Universe) సోషల్ మీడియాలో షేర్ చేశారు. ఆయన వెల్లడించిన వివరాల ప్రకారం.. ఈ ఫోన్ డిస్‌ప్లేను అవసరాన్ని బట్టి 16:9 నుంచి 21:9 యాస్పెక్ట్ రేషియో వరకు విస్తరించుకోవచ్చు. సాధారణ స్మార్ట్‌ఫోన్లలో డిస్‌ప్లే పరిమాణం స్థిరంగా ఉంటుంది. కానీ ఈ కొత్త టెక్నాలజీతో ఫోన్‌ను చిన్న పరిమాణంలో ఉపయోగించుకోవడంతో పాటు, అవసరమైనప్పుడు డిస్‌ప్లేను స్లైడ్ చేసి పెద్దదిగా మార్చుకోవచ్చు. ముఖ్యంగా వీడియోలు చూడటం, గేమింగ్ ఆడటం, మల్టీమీడియా కంటెంట్ వినియోగించడం వంటి పనులకు ఈ డిజైన్ ఉపయోగపడే అవకాశం ఉంది.

లీకైన చిత్రాలను పరిశీలిస్తే ఈ ఫోన్ స్క్వేర్ ఆకారంలో కనిపిస్తోంది. దీని డిజైన్ ప్రస్తుతం మార్కెట్‌లో అందుబాటులో ఉన్న సాధారణ స్మార్ట్‌ఫోన్లకు భిన్నంగా ఉంది. ఫోన్ వెనుక భాగంలో రెండు కెమెరాలు కనిపిస్తున్నాయి. డిస్‌ప్లేను స్లైడ్ చేసినప్పుడు కెమెరా మాడ్యూల్‌లోని ఒక భాగం ముందు వైపు విస్తరించేలా డిజైన్ చేసినట్లు తెలుస్తోంది. మరో కెమెరా మాడ్యూల్ వెనుక భాగంలో స్థిరంగా ఉంటుంది.

అయితే ఈ ఫోన్ బ్యాటరీ సామర్థ్యం కంపెనీకి పెద్ద సవాలుగా మారే అవకాశం ఉందని ఐస్ యూనివర్స్ అభిప్రాయపడ్డారు. స్లైడింగ్ మెకానిజం కోసం అదనపు స్థలం అవసరం కావడంతో బ్యాటరీ పరిమాణంపై పరిమితులు ఏర్పడవచ్చు. ప్రస్తుతం ఈ ఫోన్ అభివృద్ధి దశలో ఉన్నట్లు సమాచారం. దీని వాణిజ్య విడుదలపై సామ్ సంగ్ అధికారిక ప్రకటన చేయలేదు.

Galaxy Z Fold 8 ప్రత్యేకతలు ఇవే!

ఇదిలా ఉండగా, శాంసంగ్ తన ఫోల్డబుల్ స్మార్ట్‌ఫోన్ విభాగంలో Galaxy Z Fold 8 మోడల్‌తోనూ వార్తల్లో నిలుస్తోంది. ఈ ఫోన్‌లో 7.6 అంగుళాల డైనమిక్ AMOLED డిస్‌ప్లే, Qualcomm Snapdragon 8 Elite Gen 5 చిప్‌సెట్ ఉన్నట్లు సమాచారం. ఈ స్మార్ట్‌ఫోన్ 16GB RAM, 1TB వరకు స్టోరేజ్ ఆప్షన్‌తో వస్తుంది. దీని వైడ్ డిస్‌ప్లే డిజైన్ ప్రత్యేక ఆకర్షణగా నిలుస్తుంది. అలాగే 4,800mAh బ్యాటరీని అందించినట్లు సమాచారం. ఛార్జింగ్ విషయానికి వస్తే 45W వైర్డ్ ఛార్జింగ్, వైర్‌లెస్ ఛార్జింగ్ సపోర్ట్ ఉన్నట్లు పేర్కొంటున్నారు. ఈ ఫోన్ Android 17 ఆధారిత One UI 9 ఆపరేటింగ్ సిస్టమ్‌తో పనిచేస్తుంది. ఫొటోగ్రఫీ కోసం వెనుకవైపు 50MP + 50MP కెమెరా సెటప్, సెల్ఫీలు, వీడియో కాల్స్ కోసం 10MP ఫ్రంట్ కెమెరా అందించినట్లు సమాచారం.

త్వరలో స్మార్ట్‌ఫోన్ మార్కెట్‌లో కొత్త ట్రెండ్?

ఇప్పటికే ఫోల్డబుల్ ఫోన్లతో స్మార్ట్‌ఫోన్ డిజైన్‌లో మార్పులు తీసుకొచ్చిన సామ్ సంగ్.. స్లైడింగ్ డిస్‌ప్లే టెక్నాలజీని కూడా విజయవంతంగా అభివృద్ధి చేస్తే మార్కెట్‌లో మరో కొత్త ట్రెండ్‌కు తెరలేపే అవకాశం ఉంది. అయితే ఈ స్లైడింగ్ గెలాక్సీ ఫోన్ ఎప్పుడు లాంచ్ అవుతుంది? ధర ఎంత ఉంటుంది? బ్యాటరీ సామర్థ్యం ఎలా ఉండబోతోంది? వంటి వివరాలు ఇంకా వెల్లడికాలేదు. ప్రస్తుతం అందుబాటులో ఉన్న సమాచారం లీకులు, టిప్‌స్టర్ వెల్లడించిన వివరాల ఆధారంగానే ఉంది. కంపెనీ అధికారిక ప్రకటన కోసం వేచి చూడాల్సిందే.