Realme C01: 6500mAh బ్యాటరీతో కొత్త రియల్‌మీ ఫోన్.. 120Hz డిస్‌ప్లే, ధర వివరాలు!

Realme C01: స్మార్ట్‌ఫోన్ మార్కెట్‌లో రియల్‌మీ మరో కొత్త ఫోన్‌తో వార్తల్లో నిలిచింది. Realme C01 పేరుతో వచ్చిన ఈ బడ్జెట్ స్మార్ట్‌ఫోన్‌ను వియత్నాంలోని రిటైలర్ వెబ్‌సైట్‌లో లిస్ట్ చేసినట్లు సమాచారం. భారీ 6500mAh బ్యాటరీ, 120Hz రిఫ్రెష్ రేట్ డిస్‌ప్లే, ఆండ్రాయిడ్ 16 వంటి ఫీచర్లు ఇందులో ఉన్నట్లు వెల్లడైంది. Realme C01 స్మార్ట్‌ఫోన్‌ను 4GB RAM, 64GB స్టోరేజ్ వేరియంట్‌లో వియత్నాం రిటైలర్ వెబ్‌సైట్‌లో లిస్ట్ చేశారు. వియత్నామీస్ కరెన్సీలో దీని ధర 5,990,000 VNDగా పేర్కొన్నారు. భారత కరెన్సీలో ఇది సుమారు రూ.21,920కు సమానం. ఈ ఫోన్ బ్లాక్, ఆరెంజ్, గ్రే రంగుల్లో అందుబాటులో ఉన్నట్లు రిటైలర్ లిస్టింగ్‌లో పేర్కొన్నారు.

Realme C01లో 6.8 అంగుళాల LCD డిస్‌ప్లే ఉన్నట్లు సమాచారం. ఇది 720 x 1520 పిక్సెల్స్ HD+ రిజల్యూషన్‌తో పాటు 120Hz రిఫ్రెష్ రేట్‌ను సపోర్ట్ చేస్తుంది. స్క్రోలింగ్, యాప్‌ల మధ్య మారడం వంటి పనుల్లో ఈ రిఫ్రెష్ రేట్ ఉపయోగపడుతుంది. అలాగే, డిస్‌ప్లే గరిష్ఠ బ్రైట్‌నెస్ 900 నిట్స్ వరకు ఉంటుందని, రక్షణ కోసం పాండా గ్లాస్‌ను అందించినట్లు వివరాలు సూచిస్తున్నాయి.

ఈ ఫోన్‌లో Unisoc T7250 ఆక్టా-కోర్ ప్రాసెసర్‌ను ఉపయోగించినట్లు సమాచారం. ఇది గరిష్ఠంగా 1.8GHz ఫ్రీక్వెన్సీతో పనిచేస్తుందని, గ్రాఫిక్స్ కోసం Mali-G57 GPU ఉందని పేర్కొన్నారు. ఇందులో 4GB RAM, 64GB ఇంటర్నల్ స్టోరేజ్ లభిస్తాయి. అవసరమైతే microSD కార్డు ద్వారా స్టోరేజ్‌ను పెంచుకునే సదుపాయం కూడా ఉన్నట్లు సమాచారం. ఫోటోగ్రఫీ కోసం Realme C01లో 8MP వెనుక కెమెరా అందించినట్లు రిటైలర్ వివరాలు వెల్లడిస్తున్నాయి. ఈ కెమెరాతో సెకనుకు 30 ఫ్రేమ్‌ల వేగంతో 1080p వీడియోలను రికార్డ్ చేయవచ్చని సమాచారం.

సెల్ఫీలు, వీడియో కాల్స్ కోసం ముందు భాగంలో 5MP కెమెరా ఇచ్చినట్లు పేర్కొన్నారు. కెమెరా ఫీచర్లను పరిశీలిస్తే, ఇది ప్రాథమిక ఫోటోగ్రఫీ, రోజువారీ వినియోగాన్ని లక్ష్యంగా చేసుకున్న ఫోన్‌గా కనిపిస్తోంది. ఈ ఫోన్‌లో ప్రధాన ఆకర్షణ 6500mAh బ్యాటరీ. సాధారణ వినియోగంలో ఎక్కువసేపు ఫోన్ ఉపయోగించాలనుకునే వారికి ఈ బ్యాటరీ సామర్థ్యం ప్రయోజనకరంగా ఉండవచ్చు. చార్జింగ్ కోసం 15W ఫాస్ట్ చార్జింగ్ సపోర్ట్ ఇచ్చినట్లు సమాచారం.

Realme C01 ఆండ్రాయిడ్ 16 ఆపరేటింగ్ సిస్టమ్‌తో వస్తున్నట్లు లిస్టింగ్‌లో పేర్కొన్నారు. కనెక్టివిటీ పరంగా 4G, డ్యూయల్ నానో సిమ్, Wi-Fi, Bluetooth 5.2, NFC, GPS, USB Type-C వంటి ఫీచర్లు ఉన్నాయి. అలాగే, 3.5mm హెడ్‌ఫోన్ జాక్, సైడ్ మౌంటెడ్ ఫింగర్‌ప్రింట్ స్కానర్‌ను కూడా అందించారు. ధూళి, నీటి చిమ్ముర్ల నుంచి రక్షణ కోసం IP64 రేటింగ్ ఉన్నట్లు పేర్కొన్నారు.