Oppo F35 Pro: ఒప్పో F35 ప్రో భారత్ లో రిలీజ్ కు రెడీ.. 10,000mAh బ్యాటరీతో అదిరిపోయే ఫోన్!

చైనాకు చెందిన ప్రముఖ స్మార్ట్‌ఫోన్ తయారీ సంస్థ ఒప్పో త్వరలో భారత మార్కెట్లో కొత్త F35 సిరీస్‌ను తీసుకురావడానికి సిద్ధమవుతున్నట్లు సమాచారం. ఇప్పటికే ఈ ఏడాది ఏప్రిల్‌లో భారత్‌లో Oppo F33 సిరీస్‌ను విడుదల చేసిన కంపెనీ.. తదుపరి తరం F35 సిరీస్‌పై దృష్టి పెట్టినట్లు తెలుస్తోంది. ఈ సిరీస్‌లో Oppo F35 Pro కూడా ఉండే అవకాశం ఉంది. మీడియా నివేదికల ప్రకారం, Oppo F35 సిరీస్ ఈ నెలలోనే భారతదేశంలో లాంచ్ అయ్యే అవకాశం ఉంది. F35 Pro ధర సుమారు రూ.40,000 నుంచి రూ.45,000 మధ్య ఉండొచ్చని అంచనా. అయితే కంపెనీ నుంచి ధర, లాంచ్ తేదీపై అధికారిక ప్రకటన రావాల్సి ఉంది.

Oppo A7 Pro Max రీబ్రాండెడ్ వెర్షన్?

Oppo F35 Pro ఇటీవల చైనాలో విడుదలైన Oppo A7 Pro Maxకు రీబ్రాండెడ్ వెర్షన్‌గా వచ్చే అవకాశం ఉందని ప్రచారం జరుగుతోంది. ఈ ఫోన్ భారీ బ్యాటరీ, అధిక రిఫ్రెష్ రేట్ డిస్‌ప్లే, 50MP కెమెరాలతో ఆకట్టుకునే ఫీచర్లను అందించనుంది. భారత మార్కెట్లో విడుదలైతే, ఇదే ధర విభాగంలోని ఇతర ప్రీమియం మిడ్‌రేంజ్ స్మార్ట్‌ఫోన్లకు ఇది పోటీగా నిలిచే అవకాశం ఉంది.

6.78 అంగుళాల AMOLED డిస్‌ప్లే

Oppo A7 Pro Maxలో 6.78 అంగుళాల Full HD+ AMOLED డిస్‌ప్లే అందించారు. ఇది 1,272 x 2,772 పిక్సెల్స్ రిజల్యూషన్‌తో పాటు 120Hz రిఫ్రెష్ రేట్, 330Hz టచ్ శాంప్లింగ్ రేట్‌ను సపోర్ట్ చేస్తుంది. అలాగే డిస్‌ప్లే గరిష్టంగా 1,800 నిట్స్ బ్రైట్‌నెస్ అందిస్తుంది. Oppo F35 Proలో కూడా 120Hz రిఫ్రెష్ రేట్‌తో కూడిన 6.78 అంగుళాల 1.5K LTPS OLED ఫ్లాట్ డిస్‌ప్లే ఉండవచ్చని అంచనా.

Snapdragon 4 Gen 5 ప్రాసెసర్

పర్ఫార్మెన్స్ విషయానికి వస్తే Oppo F35 Proలో Qualcomm Snapdragon 4 Gen 5 చిప్‌సెట్ ఉండవచ్చని సమాచారం. రోజువారీ పనులతో పాటు సోషల్ మీడియా, వీడియో స్ట్రీమింగ్, మల్టీ టాస్కింగ్ వంటి అవసరాలకు ఈ ప్రాసెసర్ సరిపడే పనితీరును అందించే అవకాశం ఉంది.

50MP కెమెరాలతో ఫోటోగ్రఫీ

కెమెరాల విషయానికి వస్తే.. వెనుక భాగంలో 50MP ప్రైమరీ కెమెరా ఉండే అవకాశం ఉంది. దీనికి OIS సపోర్ట్ లభించవచ్చని తెలుస్తోంది. దీనితో పాటు 2MP సెకండరీ కెమెరా ఉండొచ్చని అంచనా. సెల్ఫీలు, వీడియో కాల్స్ కోసం ముందువైపు 50MP Samsung JN5 కెమెరా ఉండవచ్చని సమాచారం. ఈ ఫ్రంట్ కెమెరాకు ఆటోఫోకస్ సపోర్ట్ కూడా లభించే అవకాశం ఉంది.

10,000mAh భారీ బ్యాటరీ

Oppo F35 Proలో ప్రధాన ఆకర్షణగా 10,000mAh భారీ బ్యాటరీ ఉండనుందని అంచనా. ఎక్కువ బ్యాటరీ బ్యాకప్ కోరుకునే వినియోగదారులకు ఇది ప్రత్యేకమైన ఫీచర్‌గా మారే అవకాశం ఉంది. అదనంగా, Oppo A7 Pro Maxలో 10,000mAh బ్యాటరీకి 80W వైర్డ్ ఫాస్ట్ ఛార్జింగ్ సపోర్ట్ ఉంది. ఇదే ఫోన్‌కు రీబ్రాండెడ్ వెర్షన్‌గా F35 Pro వస్తే, ఈ ఫాస్ట్ ఛార్జింగ్ టెక్నాలజీ కూడా అందుబాటులో ఉండే అవకాశం ఉంది.

Android 16, ColorOS 16

సాఫ్ట్‌వేర్ విషయానికి వస్తే.. Oppo A7 Pro Max Android 16 ఆధారిత ColorOS 16పై పనిచేస్తుంది. Oppo F35 Proలో కూడా ఇదే సాఫ్ట్‌వేర్ అందించే అవకాశం ఉంది.

ధర ఎంత ఉండొచ్చు?

భారత్‌లో Oppo F35 Pro ధర రూ.40,000 నుంచి రూ.45,000 మధ్య ఉండవచ్చని అంచనాలు ఉన్నాయి. అయితే ఇది ప్రస్తుతానికి లీకులు, మీడియా నివేదికల ఆధారంగా వచ్చిన సమాచారం మాత్రమే. Oppo నుంచి అధికారిక ధర, లాంచ్ తేదీ, పూర్తి స్పెసిఫికేషన్లపై స్పష్టత రావాల్సి ఉంది.